Miss World 2024: चेक रिपब्लिकची क्रिस्टिना पिस्कोव्हा ठरली 'मिस वर्ल्ड'; थाटात पार पडली स्पर्धेची अंतिम फेरी

Miss World 2024: 71 वी मिस वर्ल्ड स्पर्धा (Miss World 2024) काल थाटात पार पडली. मिस वर्ल्ड स्पर्धेचा ग्रँड फिनाले काल (9 मार्च) जिओ वर्ल्ड कन्व्हेन्शन सेंटर, मुंबई येथे झाला. चेक रिपब्लिकची क्रिस्टिना पिस्कोव्हा (Krystyna Pyszkova) ही या स्पर्धेची विजेती ठरली आहे. माजी मिस वर्ल्ड कॅरोलिना बिलावस्का हिने क्रिस्टिना पिस्कोव्हाला मिस वर्ल्डचा क्राऊन दिला. लेबनॉनची यास्मिना (Yasmina Zaytoun) ही स्पर्धेत रनर-अप ठारली.

28 वर्षांनंतर भारतात पार पडली मिस वर्ल्ड स्पर्धा

तब्बल 28 वर्षांनंतर भारतात मिस वर्ल्ड स्पर्धेचे आयोजन करण्याची संधी मिळाली. करण जोहर आणि मिस वर्ल्ड 2013 मेगन यंग फिलिपिन्स यांनी मिस वर्ल्ड स्पर्धा होस्ट केली.

भारताच्या सिनी शेट्टीने टॉप-8 स्पर्धकांच्या यादीत मिळवलं स्थान

मिस वर्ल्ड फिनालेमध्ये भारताचे प्रतिनिधित्व करणाऱ्या सिनी शेट्टीने टॉप 8 मध्ये स्थान मिळवले. यानंतर ती टॉप-4 मधून बाहेर पडली.

टॉप 4 स्पर्धक

मिस त्रिनिदाद आणि टोबॅगो, मिस बोत्सवाना, मिस चेक रिपब्लिक आणि मिस लेबनॉन यांनी टॉप 4 स्पर्धकांच्या यादीत आपले स्थान निर्माण केले.

12 जणांचा पॅनल

मिस वर्ल्ड फिनाले 2024 च्या परीक्षकांमध्ये बारा जणांचा समावेश होता. यामध्ये अभिनेत्री क्रिती सेनॉन आणि पूजा हेगडे, चित्रपट निर्माता साजिद नाडियादवाला, अमृता फडणवीस, विनीत जैन, क्रिकेटर हरभजन सिंग, मिस वर्ल्ड ऑर्गनायझेशनच्या सीईओ ज्युलिया मोर्ले सीबीई, पत्रकार रजत शर्मा आणि इतर अनेकांचा समावेश आहे.

'या' कलाकारांनी केलं परफॉर्म

गायक शानने त्याचे 'तू आज की नारी' हे गाणे मिस वर्ल्ड 2024 च्या ग्रँड फिनालेमध्ये गायलं. शान व्यतिरिक्त टोनी कक्कर आणि नेहा कक्कर यांनीही फिनालेमध्ये परफॉर्म केले. नेहा कक्करने 'काला चष्मा' हे गाणे गायले, तर टोनीने 'धीमे धीमे' गाऊन संमेलनात रंगत आणली.

जाणून घ्या क्रिस्टीनाबद्दल

क्रिस्टीनाचे क्रिस्टीना पायस्को फाउंडेशन नावाचे एक फाउंडेशन आहे. टांझानियामधील मुलांसाठी तिनं अनेक कामे केली आहेत. तिने गरीब मुलांसाठी इंग्रजी शाळा सुरु केली आहे.