'आमच्या जीवाला धोकाय'; 'लागीरं झालं जी' फेम नितीश चव्हाणची पोस्ट

'लागीरं झालं जी' (Lagira Zhala Ji) या मालिकेत अज्याची भूमिका साकारलेला अभिनेता नितीश चव्हाण (Nitish Chavan) सध्या त्याच्या सोशल मीडियावरील एका पोस्टमुळे चर्चेत आला आहे. 'आमच्या जीवाला धोकाय' असं त्याने या पोस्टमध्ये लिहिलंय. नितेशची ही पोस्ट पाहून चाहत्यांमध्ये खळबळ उडाली आहे. नेमकं काय झालंय, असा प्रश्न चाहत्यांना पडला आहे. या पोस्टसोबत नितेशने स्वत:चा फोटो पोस्ट केला आहे. या फोटोमध्ये तो हातात एक फलक घेऊन उभा आहे. 'आम्ही पळून जाऊन लग्न केलंय. आमच्या जीवाला धोकाय' असं या फलकावर लिहिलेलं आहे. ही पोस्ट पाहून चाहत्यांना धक्का बसला आहे.

'मी आतापर्यंत सोशल मीडियावर माझ्या रिलेशनबद्दल सांगितलं नाही. कारण घरच्यांचा विरोध होता आणि अजूनही आहे. त्यामुळे आम्हाला हा निर्णय घ्यावा लागला आहे. कालच आम्ही पळून जाऊन लग्न केलंय, मला खरंतर हे असं सगळ्यांसमोर सांगायचं नव्हतं. पण कालपासून तिच्या घरून मला वारंवार धमक्या येत आहेत, म्हणून हे सांगावं लागतंय,' असं नितीशने लिहिलंय. या पोस्टमध्ये त्याने मानसी भावलकर हिला टॅग केलंय.

मानसीनेही तिच्या अकाऊंटवर अशीच पोस्ट केली आहे. 'आम्ही पळून लग्न केलंय. घरच्यांचा विरोध असल्यामुळे आम्हाला हे पाऊल उचलायला लागलं. आम्हाला तुमच्या मदतीची गरज आहे,' असं तिने लिहिलं आहे. या दोघांच्या पोस्टवर विविध प्रतिक्रिया येऊ लागल्या आहेत. काहींनी याला प्रमोशनचा फंडा म्हटलंय. तर काहींनी दोघांविषयी चिंता व्यक्त केली आहे. आता हे नेमकं काय प्रकरण आहे, याबाबत नितीश आणि मानसीच नेटकऱ्यांना सांगू शकतील.