लता मंगेशकरांची तब्येत स्थिर; अफवांवर ठेऊ नका विश्वास

मुंबई: दैवी आवाज अशा शब्दांत ज्यांच्या गायकीचं वर्णन अनेकांनी केलंय त्या ज्येष्ठ सिने गायिका आणि भारतरत्न लता मंगेशकर यांना कोरोनाची बाधा झाली आहे. त्यासोबतच त्यांना न्यूमोनियाची देखील लागण झाली आहे. त्यामुळे त्यांची तब्येत अस्थिर असून त्यांच्यावर मुंबईमधील ब्रीच कँडी रुग्णालयात (Breach candy Hospital) उपचार सुरु आहेत.

त्यांच्या तब्येतीसंदर्भात आता माहिती कळवण्यात आली आहे. लता मंगेशकर यांच्या पीआर टीमकडून असं कळवण्यात आलंय की, लता मंगेशकर यांची तब्येत स्थिर आहे. मात्र, त्यांच्यासंदर्भात खोट्या बातम्या पसरवल्या जात आहेत हे पाहून त्रास होतो आहे. लता दीदींची प्रकृती स्थिर आहे. सक्षम डॉक्टरांकडून त्यांच्यावर उपचार सुरु असून त्या आयसीयूमध्ये आहे. कृपया त्या लवकर सुखरुप घरी परतण्यासाठी प्रार्थना करा, अशी विनंती त्यांच्या पीआर टीममधील अनुषा श्रीनिवासन अय्यर यांनी केली आहे.