गायिका वैशाली माडे राष्ट्रवादी काँग्रेसमध्ये करणार प्रवेश

प्रसिद्ध पार्श्वगायिका वैशाली माडे राष्ट्रवादी काँग्रेस पक्षात प्रवेश करणार आहे. येत्या ३१ मार्च रोजी मुंबईतील राष्ट्रवादी काँग्रेसच्या मुख्यालयात खासदार सुप्रिया सुळे यांच्या उपस्थितीत वैशाली राष्ट्रवादीत प्रवेश करणार आहे. पक्षप्रवेशानंतर वैशालीकडे कोणती जबाबदारी दिली जाईल, याबाबत अद्याप काही माहिती समोर आली नाही. राष्ट्रावादी काँग्रेसच्या चित्रपट, कला, साहित्य आणि सांस्कृतिक आघाडीचे प्रदेशाध्यक्ष बाबासाहेब पाटील यांनी 'एबीपी माझा' या वृत्तवाहिनीशी बोलताना याबाबतची माहिती दिली. वैशालीने आतापर्यंत मराठी चित्रपट, मालिका तसंच हिंदी चित्रपटातील गाणीही गायली आहेत. 

गायनस्पर्धांपासून करिअरची सुरुवात करणारी वैशाली वर्धा जिल्ह्यातील हिंगणघाटची आहे. २००८ मध्ये झी मराठी वाहिनीवरील 'सा रे ग म प' या गायनस्पर्धेचं विजेतेपद तिने पटकावलं होतं. प्रसिद्ध पार्श्वगायिका होण्यापर्यंतचा तिचा प्रवास काही सोपा नव्हता. आयुष्यातील अनेक चढउतारांचा सामना करत वैशालीने गायनविश्वात स्वत:ची वेगळी ओळख निर्माण केली. वैशालीने 'बिग बॉस मराठी' या रिअॅलिटी शोमध्येही भाग घेतला होता. 

हेही वाचा : झी मराठी पुरस्कार सोहळ्यात 'या' मालिकेने मारली बाजी 

वैशालीने मराठीसोबतच हिंदीतही आपल्या सुमधूर आवाजाची छाप सोडली. 'बाजीराव मस्तानी' या संजय लीला भन्साळी दिग्दर्शित चित्रपटातील 'पिंगा' हे गाणं वैशालीन गायलं आणि हे गाणं प्रचंड गाजलं. या गाण्यासाठी तिला अनेक पुरस्कारदेखील मिळाले. 'कलंक' या चित्रपटातील 'घर मोरे परदेसिया' हे गाणंसुद्धा तिने श्रेया घोषालसोबत मिळून गायलं.