नेटफ्लिक्स हा ओटीटी प्लॅटफॉर्म आता सर्वांनाच माहिती आहे. केवळ ओटीटी प्लॅटफॉर्म न राहता, NETFLIX ही चित्रपट आणि वेब सीरीज निर्मिती क्षेत्रातील एक अग्रगण्य कंपनी झाली आहे. मात्र, ही कंपनी सुरुवातीला काय करायची हे तुम्हाला माहिती आहे?
नेटफ्लिक्स कंपनी ही सुरुवातीला केवळ एक डीव्हीडी विक्री करणारी कंपनी होती. लोकांना DVD च्या माध्यमातून आवश्यक ते चित्रपट उपलब्ध करून देण्याचं काम ही कंपनी करायची. सोबतच, डीव्हीडी भाड्याने देण्याचं कामही नेटफ्लिक्स करत होती. यानंतर ओटीटी क्षेत्रात उडी घेत नेटफ्लिक्सने मनोरंजन क्षेत्राचा चेहरामोहराच बदलून टाकला.
ओटीटी आणि प्रॉडक्शन क्षेत्रातील जायंट कंपनी झाल्यानंतर देखील नेटफ्लिक्सचा डीव्हीडी डिस्ट्रिब्युशन विभाग कार्यरत होता. मात्र, आता हा विभाग बंद होणार आहे. येत्या शुक्रवारी नेटफ्लिक्स आपली शेवटची डीव्हीडीची ऑर्डर प्लेस करेल. त्यानंतर ही फॅक्टरी बंद करण्यात येणार आहे.
1998 साली नेटफ्लिक्सने पाठवलेली पहिली डीव्हीडी 'बीटलज्यूस' या सिनेमाची होती. एके काळी नेटफ्लिक्सच्या डीव्हीडी डिस्ट्रीब्युशन प्लांटमध्ये एका आठवड्यात 1.2 दशलक्ष डीव्हीडी प्रोसेस होत होत्या. या ठिकाणी त्या वेळी 50 लोक काम करत होते. या ठिकाणी आता केवळ सहा कर्मचारी शिल्लक आहेत.
नेटफ्लिक्सचा लाल रंगाचा लोगो तुम्हाला माहितीच असेल. हा लोगो लाल असण्याचं कारण देखील या डीव्हीडी विभागाशी संबंधित आहे. नेटफ्लिक्स आपल्या DVD या लाल रंगाच्या विशिष्ट लिफाफ्यात पाठवत होते. त्यामुळे लाल लिफाफा ही कंपनीची ओळख बनली होती. येत्या शुक्रवारी आता शेवटचे काही लाल लिफाफे पाठवण्यात येतील.
नेटफ्लिक्स कंपनीने लोकांच्या टीव्ही पाहण्याचा सवयीवर मोठा प्रभाव पाडला. ज्या काळात लोकांना केवळ टीव्हीवर जे आहे तेच पाहता येत होतं, तेव्हा नेटफ्लिक्सने लोकांना त्यांच्या आवडीची गोष्ट पाहण्याचा पर्याय दिला. त्यामुळे नेटफ्लिक्सचं डीव्हीडी डिव्हिजन बंद होणं हा एका पर्वाचा अंत मानला जातो आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
