झी मराठी पुरस्कार सोहळ्यावर प्रेक्षकांनी व्यक्त केली नाराजी

Zee Marathi Awards : टेलिव्हिजनवरील बहुचर्चित आणि बहुप्रतिक्षित झी मराठी पुरस्कार सोहळा ३० नोव्हेंबर रोजी पार पडला. या पुरस्कार सोहळ्यामध्ये 'तुझी माझी रेशीमगाठ', 'तुझ्या माझ्या संसाराला आणि काय हवं?' या दोन मालिकांचं वर्चस्व पहायला मिळालं. अल्पावधीतच या मालिकांनी लोकप्रियता कमावली. मात्र काही कारणांमुळे हा पुरस्कार सोहळा सोशल मीडियावर चर्चेचा विषय ठरतोय. या सोहळ्यातील काही बाबींवर प्रेक्षकांनी प्रश्न उपस्थित केले आहेत.

अभिनेत्री प्रार्थना बेहरेला या पुरस्कार सोहळ्यात तीन पुरस्कार मिळाले. तर संकर्षण कऱ्हाडेलाही तीन पुरस्कार मिळाले. 'माझी तुझी रेशीमगाठ' या मालिकेतील इतरही कलाकारांनी पुरस्कारांवर आपलं नाव कोरलं. एकीकडे या मालिकेचं आणि त्यातील कलाकारांचं सोशल मीडियावर कौतुक होत असताना दुसरीकडे पुरस्कार सोहळ्यातील काही पुरस्कार विनाकारण देण्यात आल्याचं नेटकऱ्यांनी म्हटलंय. भावी सून म्हणून 'येऊ कशी तशी मी नांदायला' या मालिकेतील स्वीटूला पुरस्कार मिळाला, तर भावी सासू म्हणून ओमकारच्या आईला म्हणजेच शकूला पुरस्कार मिळाला. स्वीटूने मोहीतशी लग्न केलं असताना ती भावी सून कशी असू शकते, असा प्रश्न प्रेक्षकांनी उपस्थित केला आहे.

याउलट भावी सून म्हणून 'तुझ्या माझ्या संसाराला..' या मालिकेतील अदितीला आणि भावी सासू म्हणून सिद्धूच्या आईला पुरस्कार द्यायला हवा होता, असं मत नेटकऱ्यांनी व्यक्त केलं. भावी सासू म्हणून 'मन उडू उडू झालं' या मालिकेतील दीपूचादेखील विचार करायला हवा होता, असंही नेटकऱ्यांनी म्हटलंय.