Priyanka Chopra: "हे विधेयक अमलात..", महिला आरक्षण विधेयक मंजूर झाल्यावर काय म्हणाली प्रियंका चोप्रा?

Priyanka Chopra React To Women Reservation Bill: गेल्या काही दिवसांपासून लोकसभा आणि राज्यसभेत महिला आरक्षण विधेयक चर्चेत होते. नारी शक्ती वंदन विधेयक लोकसभेत मंजूर झाल्याने महिलांना आता लोकसभा आणि विधानसभेत ३३ टक्के आरक्षण मिळेल.

हे विधेयक एक तृतियांश पेक्षा जास्त मतांनी मंजूर करण्यात आले. नारी शक्ती वंदन विधेयक मंजूर झाल्याने हा एक ऐतिहासिक क्षण असल्याचं मानलं जात आहे.

हे विधेयक मंजूर झाल्यानंतर सर्वसामान्य नागरिकांपासून तर कलाकारांपर्यंत सर्वांनीच यावर आपली मते मांडली आहेत. आता अभिनेत्री प्रियांका चोप्राने महिला आरक्षण विधेयक मंजूर झाल्याबद्दल आनंद व्यक्त केला आहे.

प्रियंका चोप्राने तिच्या इंस्टाग्राम स्टोरीमध्ये हे विधेयक मंजूर झालेल्या बातमीचा एक स्क्रीनशॉट शेअर केला आहे. यात प्रियंकाने लिहिले की, 'हे ऐतिहासिक पाऊल नव्या युगासाठी प्रेरणा देणारे आहे. महिला आरक्षण विधेयक आणि नारी शक्ती वंदन कायदा मंजूर होणे हे निःसंशयपणे योग्य दिशेने टाकलेलं पाऊल आहे. मात्र, त्याची लवकर अंमलबजावणी महत्त्वाची आहे. आम्ही अशा भारताकडे वाटचाल करत आहोत जो खऱ्या अर्थाने महिलांना सक्षम करेल.'

प्रियांका चोप्राच्या आधी हेमा मालिनीपासून तर कंगनापर्यंत सर्वांनीही महिला आरक्षण विधेयकाला पाठिंबा दिला होता. हेमा मालिनी म्हणाल्या होत्या की मोदीजींनी तेच केले जे कोणीही करू शकत नाही.

कंगना रणौतने पंतप्रधान मोदींच्या नेतृत्वाचे कौतुक करत याला ऐतिहासिक म्हटले तर ईशा गुप्ताने याला गेम चेंजर बिल म्हणत याचे कौतुक केले होते.

महिला आरक्षण विधेयक दोन्ही सभागृहात मंजूर झाले आहे. आता राष्ट्रपतींची मान्यता मिळाल्यानंतर कायदा बनवण्याची वाटचाल सुरू होणार आहे. मात्र, हे विधेयक अमलात आणण्यासाठी अजून बराच वेळ लागेल असं बोललं जात आहे. २०२६ नंतर नारी शक्ती वंदन कायदा लागू होईल. त्यानंतर महिलांना आरक्षण मिळण्यास सुरुवात होईल.