Raj Thackeray: 'स्वत:चं मुस्लिम नाव आडनाव पण लपवण्याच्या..', वहिदा रेहमान यांच्यासाठी राज ठाकरेंची खास पोस्ट!

Raj Thackeray On Waheeda Rehman: आपल्या दमदार अभिनयासाठी ओळखल्या जाणाऱ्या बॉलीवूडमधील ज्येष्ठ अभिनेत्री वहिदा रेहमान यांना दादासाहेब फाळके जीवनगौरव पुरस्काराने सन्मानित करण्यात येणार आहे. वहिदा त्याच्या कार्याप्रती समर्पणासाठी ओळखल्या जातात.

वहिदा रेहमान यांनी गाईड, कागज के फूल असे अनेक आयकॉनिक चित्रपट दिले आहेत. दमदार अभिनयामुळे वहिदा रहमान यांचा सन्मान करण्यात येणार आहे. या घोषणेनंतर वाहिदा यांच्यावर सर्वच स्तरावरुन अभिनंदनाचा वर्षाव होत आहे.

आता त्यातच मनसे अध्यक्ष राज ठाकरे यांनी देखील बॉलीवूडमधील ज्येष्ठ अभिनेत्री वहिदा रेहमान यांच्यासाठी एक खास ट्वीट करत त्याच्या अभिनयाचं कौतुक केलं आणि त्यांना हा पुरस्कार मिळाल्याबद्दल त्याचे अभिनंदन केले आहे.

वहिदा यांचे कौतुक करत राज ठाकरे आपल्या ट्विटमध्ये लिहितात की, "वहिदा रहमान ह्यांना दादासाहेब फाळके पुरस्कार घोषित झाला, त्याबद्दल त्यांचं मनापासून अभिनंदन. १९५६ ला राज खोसला ह्यांच्या 'सीआयडी' सिनेमातून करिअरला सुरुवात करत ते आजच्या तारखेपर्यंत सक्रिय असणाऱ्या वहिदाजी ह्या भारतीय सिनेमाचा जवळपास ६० वर्षांचा इतिहास आहे."

राज ठाकरे पुढे लिहितात की, 'तुम्ही जे निवडता, त्यावर तुमची श्रद्धा असेल आणि कामाप्रती निष्ठा असेल तर तुम्ही अगदी पहिल्या दिवसापासून तुमचे नियम लोकांना स्वीकारायला लावू शकता हे वहिदाजींनी दाखवून दिलं. पहिल्याच सिनेमात त्यांनी एका सीनसाठी मी वेडेवाकडे कपडे घालून शॉट देणार नाही असं ठासून सांगितलं.

पहिलाच सिनेमा आहे, डायरेक्टर जे सांगेल ते ऐकलं पाहिजे इत्यादी गोष्टींना बाजूला सारत, मी जर ह्या क्षेत्रांत टिकणार असेन तर माझ्या तत्वांशी मी तडजोड करणार हे नाही हे सांगणं सोपं नाही, पण ते वहिदाजींना जमलं. स्वतःचं मुस्लिम नाव आडनाव पण लपवण्याच्या भानगडीत त्या कधी पडल्या नाहीत आणि त्यांचं हिंदुस्थानीपण इतकं पक्क होतं की त्यांचा धर्म लोकांच्या मनाला शिवलं पण नाही.'

"अशा व्यक्तीला हा सन्मान मिळणं ह्यासारखी आनंदाची गोष्ट नाही, अर्थात वहिदाजीच नाहीत तर कुठल्याही कलाकाराला हे पुरस्कार थोडे आधी मिळायला काहीच हरकत नाही. पण असो.

वहिदाजींना महाराष्ट्र नवनिर्माण सेनेतफे मनःपूर्वक शुभेच्छा !"

सध्या राज यांची ही पोस्ट सोशल मीडियावर चर्चेचा विषय बनली आहे. नेटकरी या पोस्टवर प्रतिक्रिया देत आहे. वहिदासारखी तत्त्व जोपासणारी व्यक्ती सापडणार नाहीत , त्या उत्तम अभिनेत्री आहेत अशा अनेक कमेंट या पोस्टला येत आहे.

वहिदा रहमान या इंडस्ट्रीतील प्रतिष्ठित कलाकारांपैकी एक आहेत. आपल्या करिअरमध्ये त्यांनी 'गाईड', 'प्यासा', 'कागज के फूल' आणि 'चौदहवीं का चांद', चाँदनी, दिल्ली 6, बीस साल बाद यांसारख्या चित्रपटांमध्ये काम केले आहे.