रश्मी देसाईची असंवेदनशीलता; काबूलमधल्या भयावह परिस्थितीवर पोस्ट केला हसण्याचा इमोजी

तालिबानने Taliban अफगाणिस्तानातील Afghanistan सत्ता काबीज केल्यानंतर तिथल्या नागरिकांची देशातून जीवघेणी पळापळ सुरू झाली. लोकांचे लोंढे काबूल Kabul विमानतळावर दाखल झाले. सोमवारी काबूलमध्ये अक्षरश: अनागोंदी माजलेली पहायला मिळाली. तालिबान्यांच्या दहशतीने भयभीत शेकडो नागरिक मुलाबाळांसह देश सोडण्यासाठी काबूल विमानतळावर जमले. सोशल मीडियावर व्हायरल झालेल्या एका व्हिडीओत नागरिक धावपट्टीवरून धावताना दिसत आहेत. तर आणखी एका व्हिडीओत अमेरिकी सैनिक धावपट्टीवरील गर्दीला पांगवण्यासाठी हवेत गोळीबार करीत असल्याचे दिसत आहे. महिला-पुरुष विमानात चढण्यासाठी धडपडत होते. मुले रडत होती, महिला आक्रोश करीत होत्या. सेलिब्रिटी फोटोग्राफर वीरल भयानीने काबूल विमानतळावरचे काही व्हिडीओ त्याच्या इन्स्टाग्राम पेजवर शेअर केले होते. यातील एका व्हिडीओवर अभिनेत्री रश्मी देसाईची Rashami Desai असंवेदनशील प्रतिक्रिया पहायला मिळाली.

या व्हिडीओत अनेक नागरिक धावपट्टीवर धावताना दिसत आहेत. तर स्वत:चा जीव वाचवून देशाबाहेर जाण्यासाठी विमानाच्या चाकावर बसलेले नागरिक यात दिसत आहेत. या व्हिडीओवर अभिनेत्री रश्मी देसाईने हसण्याचा आणि हात जोडल्याचा इमोजी पोस्ट केला. अत्यंत विदारक वास्तव दाखवणाऱ्या या व्हिडीओवर रश्मीने हसण्याचा इमोजी पोस्ट केला, यावरून अनेकांनी तिच्यावर टीका केली आहे.

विमानाच्या चाकावर आणि पंख्यावर बसून देश सोडण्याचा प्रयत्न

एकाच वेळी शेकडो लोकांनी जबरदस्तीने अमेरिकी लष्करी विमानात घुसण्याचा प्रयत्न केला. काबूल विमानतळावरून उड्डाण घेणाऱ्या विमानाच्या चाकाला लटकलेल्या दोघांचा उंचावरून पडून मृत्यू झाल्याचं कळतंय. तर काही नागरिक विमानाच्या पंख्यावर बसून जीवघेणा प्रवास करताना दिसले.

गेली २० वर्षे अमेरिका आणि मित्रदेशांनी अफगाणिस्तानला सावरण्यासाठी आणि तिथली परिस्थिती बदलण्यासाठी मदत केली. अमेरिका, ब्रिटन आणि नाटोचे सैन्य तेथे ठाण मांडून होते. अमेरिकेने तिथून सैन्यमाघारीची घोषणा केल्यानंतर तालिबान्यांनी पुन्हा डोकं वर काढलं आणि संपूर्ण सैन्यमाघारीला दोन आठवडे उरले असताना काबूल ताब्यात घेतलं. तालिबानी सैन्याने एका आठवड्यात देशावर ताबा मिळवला. सरकारी फौजांनी त्यांच्यापुढे शरणागती पत्करली.