सोशल मीडिया इन्फ्लुएन्सर विशाल फालेसोबत ऋतुजा बागवेचा रोमान्स

लग्नाआधीच्या बऱ्याच लव्हस्टोरी आपण पहिल्या आहेत, काहींनी तर अनुभवल्या देखील आहेत. मात्र लग्नानंतरची पती-पत्नी यांच्यातील लव्हस्टोरी नेमकी कशी असेल बरं, याचं साजेसं उत्तर घेऊन 'जीव रंगलया' हे गाणे प्रेक्षकांच्या भेटीस आले आहे. 'एव्हरेस्ट एंटरटेनमेंट' प्रस्तुत या गाण्याची निर्मिती 'सेवन सिझ मोशन पिक्चर'ने केली आहे. या गाण्यात अभिनेत्री ऋतुजा बागवे (Rutuja Bagwe) आणि विशाल फाले (Vishal Phale) मुख्य भूमिकेत दिसणार आहेत. सोशल मीडिया इन्फ्लुएन्सर विशाल फाले 'प्रिन्स ऑफ मुळशी' या नावाने खूपच प्रसिद्ध आहे. विशालचे सोशल मीडियावर दशलक्षांहून अधिक फॉलोअर्स आहेत. त्यांच्या या गाण्याचे पोस्टर रसिक प्रेक्षकांच्या भेटीस आले असून यात ऋतुजा आणि विशालचा रोमँटिक अंदाज पाहायला मिळत आहेत. या गाण्याच्या टिझरलाही प्रेक्षकांचा भरभरून प्रतिसाद मिळाला आहे.

'जीव रंगलया' गाण्याच्या पोस्टरमध्ये या दोघांची जोडी अगदी खुलून दिसत असून बहरत जाणाऱ्या प्रेमाची गोडी त्यांच्या चेहऱ्यावरून स्पष्ट होत आहे. या गाण्यात पती पत्नीचा लग्नानंतरचा रोमान्स, त्यांची जवळीक यांचे खूप सुंदर वर्णन पाहायला मिळणार आहे. ओंकार माने दिग्दर्शित हे गाणे असून गाण्याचे बोल आणि गाण्याच्या निर्मितीत समीर परब यांचा खारीचा वाटा आहे. ओंकारने आजपर्यंत २० गाणी दिग्दर्शित केली आहेत. या रोमँटिक गाण्याला संगीत प्रितेश कामत यांनी दिले असून गायक भूषण गोसावी यांनी हे गाणं आपल्या सुमधुर आवाजात स्वरबद्ध केले आहे. या गाण्याच्या छायाचित्रणाची जबाबदारी शशिकांत सिंग यांनी उत्तमरीत्या पेलवली.

'जीव रंगलया' या गाण्याच्या पोस्टरने गाण्याची उत्सुकता आणखीनच वाढवून ठेवली आहे. शिवाय या गाण्यात एका नव्या अंदाजात ऋतुजा आणि विशालला पाहणे औत्सुक्याचे ठरणार आहे.