बॉक्स ऑफिसवर सलमान-आयुषच्या 'अंतिम'चा जलवा

सलमान खान Salman Khan आणि त्याचा मेहुणा आयुष शर्मा Aayush Sharma यांच्या मुख्य भूमिका असलेला 'अंतिम : द फायनल ट्रुथ' Antim हा चित्रपट शुक्रवारी प्रदर्शित झाला. प्रवीण तरडे दिग्दर्शित 'मुळशी पॅटर्न' या मराठी चित्रपटाचा हा हिंदी रिमेक आहे. महेश मांजरेकर यांनी 'अंतिम'चं दिग्दर्शन केलं असून या चित्रपटाने पहिल्या दिवशी बॉक्स ऑफिसवर चांगली कमाई केली आहे. पदार्पणाच्या दिवशी जवळपास ४.२५ ते ४.०५ कोटी रुपयांचा गल्ला या चित्रपटाने जमवला आहे. वीकेंडला कमाईत आणखी वाढ होऊ शकते, असा अंदाज वर्तवला जात आहे.

अंतिम हा चित्रपट २६ नोव्हेंबर रोजी प्रदर्शित झाला. तर जॉन अब्राहमची मुख्य भूमिका असलेला 'सत्यमेव जयते २' हा त्याच्या एक दिवस आधी २५ नोव्हेंबर रोजी प्रेक्षकांच्या भेटीला आला. जॉनच्या चित्रपटाला मात्र अपेक्षित असा प्रतिसाद मिळत नाहीये. 'बॉक्स ऑफिस इंडिया' या वेबसाइटने दिलेल्या वृत्तानुसार, अंतिमने ४.२५ ते साडेचार कोटी रुपयांची कमाई केली. वीकेंडला हा आकडा आणखी वाढू शकतो. 'अंतिम'च्या प्रदर्शनाचा परिणाम 'सत्यमेव जयते २'च्या कमाईवर झाला आहे. मल्टिप्लेक्समध्ये 'सत्यमेव जयते २'च्या कमाईत ४० ते ५० टक्क्यांची घट झाली आहे.

चित्रपटात आयुष हा राहुलिया ही भूमिका साकारत आहे. चित्रपटातील क्लायमॅक्स सीन शूट करण्यासाठी जवळपास पाच ते सहा तास लागले आणि या वेळेत आयुषला तब्बल ३३ किलोमीटर धावावं लागलं. पुण्यात हा सीन चित्रित करण्यात आला. चित्रपटातील भूमिकेविषयी आयुष म्हणाला, "मला या भूमिकेसाठी शारीरिक मेहनत खूप घ्यावी लागली. कारण मला ऑनस्क्रीन फिट दिसायचं होतं. या भूमिकेने मला खूप काही दिलं. एक अभिनेता म्हणून यातून मी खूप काही शिकलो. महेश सर, सलमान भाई यांनी माझी खूप मदत केली." चित्रपटाची निर्मिती सलमाननेच केली आहे. त्याचप्रमाणे यात तेलुगू अभिनेत्री प्रज्ञा जैस्वाल, सयाची शिंदे, महिमा मकवाना हे कलाकारदेखील महत्त्वपूर्ण भूमिकेत आहेत.