'टायगर 3' सिनेमा दरम्यान फोडले फटाके आता सलमाननं चाहत्यांना फटकारलं!

Salman Khan Responded: बॉलिवूड भाईजान सलमान खानचा 'टायगर 3' हा चित्रपट मोस्ट अवेटेड चित्रपट होता. 12 नोव्हेंबरला दिवाळीच्या मुहूर्तावर 'टायगर 3' चित्रपटगृहांमध्ये प्रेक्षकांच्या भेटीला आला.

सलमानचे चाहते या चित्रपटासाठी खुपच उत्सुक होते. चाहत्यांनी थिएटरमध्ये चित्रपट पाहण्यासाठी गर्दी केली होती. सध्या याचे फोटो सोशल मिडियावर व्हायरल होत आहे.

मात्र त्यात एक व्हिडिओ सोशल मिडियावर व्हायरल झाला आहे ज्यात सलमानच्या चाहत्यांनी कहरच केला.

नाशिक जिल्ह्यातील मालेगाव येथील हा व्हिडिओ आहे. जो X प्लॅटफॉर्मवर व्हायरल झाला होता. यात सलमानच्या चित्रपटाचा आनंद घेताना चाहत्यांनी थेट हॉलमध्ये फटाके फोडले.

काही मिनिटातच चाहत्यांनी हॉलमध्ये फटाक्याची आतषबाजी झाली आणि सर्वत्र पळापळ सुरु झाली. चाहत्यांनी चित्रपटाचा आनंद साजरा करताना चित्रपटगृहातच रॉकेट उडवले आणि फटाके फोडले.

आता हा व्हिडिओ व्हायरल झाल्यानंतर थेट सलमान खानने या व्हिडिओवर प्रतिक्रिया देत चाहत्यांना चेतावणी दिली आहे.

सलमान खानने सिनेमा हॉलमध्ये फटाके फोडण्याच्या घटनेची दखल घेत सोशल मिडियावर लिहिले की, "मी टायगर 3 चित्रपट चालू असताना थिएटरमध्ये फटाक्यांची आतषबाजी करण्यात आल्याचं ऐकलं. हे धोकादायक आहे. स्वतःला आणि इतरांना धोका न देता चित्रपटाचा आनंद घेऊया. सुरक्षित रहा."

तर दुसरीकडे या व्हायरल व्हिडिओवर प्रतिक्रिया देताना चित्रपट दिग्दर्शक राम गोपाल वर्मा यांनीही चाहत्यांवर टीका केली आहे.

फटाक्यांचा व्हिडिओ व्हायरल झाल्यानंतर पोलिसांनी कारवाई करत या प्रकरणाचा तपास सुरू केला आहे. मोहन थिएटरवर छावणी पोलिस ठाण्यात कलम ११२ अन्वये गुन्हा दाखल करण्यात आला असून या प्रकरणी दोघांना ताब्यातही घेण्यात आले आहे.

दिग्दर्शक मनीष शर्माचा 'टायगर 3' हा एक अॅक्शन थ्रिलर आहे ज्यामध्ये सलमान खान, कतरिना कैफ आणि इमरान हाश्मी मुख्य भूमिकेत आहेत तर रेवती, सिमरन, रिद्धी डोगरा, विशाल जेठवा, कुमुद मिश्रा, रणवीर शौरे आणि आमिर बशीर हे देखील आहेत.