Sam Bahadur Trailer : पंतप्रधानांनाही गप्प करणारा आर्मी ऑफिसर, नजरेत होती मोठी ताकद!

Sam Bahadur Movie Trailer Vicky Kaushal As Manek shaw : प्रसिद्ध अभिनेता विकी कौशलच्या ज्या चित्रपटाच्या ट्रेलरची चाहते आतूरतेनं वाट पाहत होते त्या सॅम बहादूरचा ट्रेलर आता समोर आला आहे. त्याला प्रचंड प्रतिसाद मिळताना दिसतो आहे. विकीनं यापूर्वी उरीमध्ये एका आर्मी ऑफिसरची भूमिका साकारली होती. त्यानंतर तो आता पुन्हा एकदा बड्या आर्मी अधिकाऱ्याच्या भूमिकेत दिसणार आहे.

विकीनं काही दिवसांपूर्वी सोशल मीडियावर त्याचा सॅम बहादूरमधील तो लूक शेयर केला होता. त्याला चाहत्यांचा मोठा प्रतिसाद मिळाला होता. चाहत्यांनी त्या फोटोवर दिलेल्या प्रतिक्रियाही भन्नाट होत्या. विकीचा तो लूक भलताच लोकप्रिय झाला होता. त्यानं सॅम माणेकशॉ यांच्या भूमिकेसाठी घेतलेली मेहनतही चर्चेचा विषय होती. यासाठी विकीनं खूप वाचन केल्याचे सांगण्यात येत आहे.

प्रसिद्ध दिग्दर्शक मेघना गुलजार यांनी सॅम बहादूरचे दिग्दर्शन केले आहे. त्यांनी यापूर्वी राझी सारख्या चित्रपटाचे दिग्दर्शन केले होते. त्यालाही प्रेक्षकांचा मोठा प्रतिसाद मिळाला होता. त्यातही विकीनं एका पाकिस्तानी सैन्याधिकाऱ्याची भूमिका साकारली होती. यावेळी आलियानं त्याच्यासोबत स्क्रिन शेयर केली होती. हा चित्रपट तुफान लोकप्रिय झाला होता.

भारतीय सैन्याचे फिल्ड मार्शल सॅम माणेक शॉ यांच्या आयुष्यावर हा चित्रपट आधारित असून त्याची गेल्या अनेक दिवसांपासून चर्चा होती. सध्या त्याच्या व्हायरल झालेल्या ट्रेलरला प्रेक्षकांचा मोठा प्रतिसाद मिळाला आहे. त्यात विकीच्या अभिनयाचे कौतुक होताना दिसत आहे. यापूर्वी १३ सप्टेंबर रोजी सॅम बहादूरचा टीझर प्रदर्शित झाला होता.

डिसेंबरचा महिना विकीसाठी मोठा खास असणार आहे. त्याच्या या नव्या चित्रपटाची प्रेक्षक आतुरतेनं वाट पाहत आहेत. याचवर्षी त्याचा जरा हटके जरा बचके नावाचा चित्रपट प्रदर्शित झाला होता. त्यामध्ये प्रसिद्ध अभिनेत्री सारा अली खाननं महत्वाची भूमिकाही साकारली होती. त्याला बॉक्स ऑफिसवर मोठी पसंती मिळाली होती. विकीचा सॅम बहादूर येत्या १ डिसेंबर रोजी प्रदर्शित होणार आहे.

या प्रोजेक्टनंतर विकी कौशल हा शाहरुख सोबत डंकी नावाच्या चित्रपटामध्ये चमकणार आहे. तो पहिल्यांदाच किंग खान सोबत दिसणार आहे. त्याची त्याच्या चाहत्यांना कमालीची उत्सुकता आहे. बॉलीवूडचे प्रसिद्ध दिग्दर्शक राजकुमार हिरानी हे या चित्रपटाचे दिग्दर्शन करणार आहेत. डंकी २२ डिसेंबर रोजी प्रदर्शित होणार आहे.