सतीश कौशिक रुग्णालयात दाखल; कोरोनावरील उपचार सुरू

अभिनेते सतीश कौशिक यांना कोरोनाची लागण झाल्यानंतर मुंबईतील रुग्णालयात उपचारासाठी त्यांना दाखल करण्यात आलं आहे. ते दोन दिवस घरीच क्वारंटाइनमध्ये राहत होते. त्यानंतर आता त्यांना मुंबईतील कोकिलाबेन रुग्णालयात दाखल करण्यात आलं आहे. "सतीशजी कोरोना प्रतिबंधक लस घेणारच होते. पण त्यापूर्वी त्यांची कोरोना चाचणी केली असता त्याचा रिपोर्ट पॉझिटिव्ह आला. ते घरीच दोन दिवस क्वारंटाइनमध्ये राहत होते. पण आता योग्य उपचार मिळावा म्हणून त्यांनी रुग्णालयात दाखल होण्याचा निर्णय घेतला आहे", अशी माहिती त्यांच्या निकटवर्तीयांनी दिली. त्यांच्या आरोग्यासाठी प्रार्थना करणाऱ्या चाहत्यांनी त्यांनी आभार मानले आहेत, असंही त्यांनी सांगितलं. 

बुधवारी संध्याकाळी सतीश कौशिक यांनी ट्विट करत त्यांना कोरोनाची लागण झाल्याची माहिती दिली. "सर्वांनी कृपया याकडे लक्ष द्या. माझा कोरोना चाचणीचा अहवाल पॉझिटिव्ह आला आहे. गेल्या काही दिवसांत माझ्या संपर्कात आलेल्यांनी कृपया कोरोना चाचणी करून घ्यावी. मी घरीच क्वारंटाइनमध्ये आहे", असं ट्विट त्यांनी केलं होतं. सतीश कौशिक यांनी ट्विट करताच नेटकऱ्यांनी आणि अनेक सेलिब्रिटींनी ट्विट करत काळजी घेण्याचं आवाहन केलं. 

हेही वाचा : 'आता प्रत्येक रुग्णामागे दीड लाख रुपये बंद झाल्याने दुसरी लाट आली?', जुई गडकरी संतापली

राज्यात गेल्या तीन दिवसांपासून २५ हजारांहून अधिक कोरोनाबाधितांची नोंद होत असताना रविवारी रुग्णवाढीने ३० हजारांचा टप्पा ओलांडला. राज्यात रविवारी ३०,५३५ नव्या बाधिकांची नोंद झाली. आतापर्यंतची ही उच्चांकी दैनंदिन रुग्णवाढ आहे. राज्यात आठवड्याभरात कोरोना संसर्गाचा प्रादुर्भाव झपाट्याने झाला असून बाधितांचे प्रमाण २० टक्क्यांवर पोहोचले आहे. तर रुग्णसंख्या ९० हजारांवरून दीड लाखांवर केली आहे. गेल्या वर्षी सप्टेंबरमध्ये याच वेगाने रुग्णवाढ झाल्याचे आढळले होते.