Jawan Movie : ‘जवान’चे देशभरात पहाटे पाचपासून ‘शो’; जगभरात आज प्रदर्शित होणार

मुंबई : अभिनेता शाहरुख खानचा ‘जवान’ हा चित्रपट आज (ता. ७) जगभरातील सर्व चित्रपटगृहांमध्ये प्रदर्शित होत आहे. हिंदीबरोबरच तमीळ आणि तेलगू या भाषांमध्ये प्रदर्शित होणाऱ्या या चित्रपटाचे देशभरात अनेक शहरांतील पहाटे पाच वाजल्यापासूनचे बहुतेक खेळ हाऊसफुल्ल झाले आहेत.

मल्टिप्लेक्सबरोबरच एक पडदा चित्रपटगृहांमध्ये बुकिंगची रेकॉर्डब्रेक नोंद झाली आहे. छोट्या सेंटरवरील तिकिटे संपूर्णतः विकली जात आहेत. हा चित्रपट मोठा इतिहास घडविणार असे तज्ज्ञांचे मत आहे.

जवान हा चित्रपट अॅटली यांनी दिग्दर्शित केला आहे. रेड चिलीज एंटरटेन्मेंटची ही प्रस्तुती आहे, गौरी खान या चित्रपटाच्या निर्मात्या आहेत तर गौरव वर्मा सहनिर्माते आहेत. हाय-ऑक्टेन अॅक्शन सिक्वेन्स, एसआरकेचे आकर्षक विविध लुक्स आणि ट्रेलरमधील दमदार संवादांनी जवान चित्रपट हा अगोदरच चर्चेचा विषय ठरला आहे. या चित्रपटातील ‘जिंदा बंदा’ आणि ‘चलेया’ सारखी गाणी आधीच चार्टबस्टर ठरली आहेत.