या अभिनेत्रीनेही केले लोकलमधील फोटो शेअर..

sonalee kulkarni : मनोरंजनविश्वातील कलाकार सहसा जनमानसात येत नाहीत. चित्रीकरण, इव्हेन्ट यामध्ये कायम वैयक्तिक वाहनाचाच ते वापर करतात. पण कधीतरी काही प्रसंगांमुळे किंवा सहजच अनुभव म्हणून काही कलाकार सार्वजनिक वाहनाने प्रवास करत आहेत. या प्रवासात आलेले अनुभव आणि त्याचे फोटोही कलाकार आवर्जून शेअर करतात.

नुकताच अभिनेता (nawazuddin siddhiqui) चित्रीकरणाहून इव्हेन्टला वेळेत पोहोचण्यासाठी लोकलने प्रवास करताना दिसला. त्याच्या या प्रवासाचा व्हिडीओ व्हायरल होत असतानाच या अभिनेत्रीच्या लोकल प्रवासाची चर्चा आहे. 'झिम्मा' या चित्रपटातून नुकतीच आपल्या भेटीला येऊन गेलेली अभिनेत्री सोनाली कुलकर्णी हीने लोकल प्रवास केला आहे. मुंबईच्या लोकलने प्रवास करताना घेतलेला आनंद तिने फोटोद्वारे शेअर केला आहे. सोनालीने इन्स्टाग्रामवर स्टोरी शेअर करून चाहत्यांना याबाबतची माहिती दिली. यावेळी तिच्यासोबत एक खास व्यक्ती दिसून आली आहे.

साधारण दोन दिवसांपूर्वीचे हे फोटो असल्याची माहिती मिळाली असून सोनाली तिच्या आईसोबत लोकलमध्ये प्रवास करत असल्याचे दिसत आहे. याला “सावी कुलकर्णीसोबत अनेक वर्षानंतर मुंबई लोकलचा प्रवास” असे कॅप्शन सोनालीने दिले आहे. सध्या तिच्या पोस्टची चांगलीच चर्चा होत आहे.

या फोटोनुसार सोनाली महिला आरक्षित डब्ब्यातून प्रवास करत असल्याचे दिसत आहे. तर तिने एक साधा कुर्ता आणि मास्क परिधान केला होता. काही दिवसांपूर्वी अभिनेत्री प्रिया मराठेनेही मुंबई लोकलने प्रवास केल्याचा फोटो व्हायरल झाला होता. तर अभिनेत्री मुक्ता बर्वे हिने देखील मुंबईत रिक्षाने प्रवास केला होता.