'द काश्मिर फाईल्स' पाहणं सोनू निगम टाळतोय; कारणं सांगत केला मोठा खुलासा

'द काश्मिर फाईल्स'(The Kashmir Files) सिनेमाची भारतभरात चांगली चर्चा झाली. सिनेमावरनं अनेक वाद रंगले पण बॉक्सऑफिसवर सिनेमानं चांगलीच कमाई केली. सिनेमागृहात अनेकांनी हा सिनेमा पहायला गर्दी केलेली आपण पाहिलीच असेल पण अजूनही ज्यांना थिएटरमध्ये जाणं जमलं नाही ते सिनेमा ओटीटी वर कधी प्रदर्शित होणार याची वाट पाहत आहेत. बॉलीवूडच्या दिग्ग्जांनी देखील सिनेमाचं कौतूक तोंडभरून केलं. करण जोहर,वरुण धवन,अभिषेक बच्चन,आमिर खान या सर्वांनी सिनेमाची प्रशंसा केली आहे. पण गायक सोनू निगमनं(Sonu Nigam) मात्र अद्याप 'द काश्मिर फाईल्स' पाहिलेला नाही.

सोनू निगमने 'द काश्मिर फाईल्स' सिनेमा का पाहिला नाही याचं कारणही सांगितलं आहे. सोनू निगम म्हणे काश्मिरी पंडितांची ती विदारक कहाणी ऐकून खूप भावूक झाला आणि त्याला त्याचे अश्रू आवरले नाहीत. टाईम्स नाऊ या इंग्रजी वाहिनीला दिलेल्या मुलाखतीत सोनू निगम म्हणाला,''मी अद्याप 'द काश्मिर फाईल्स' पाहिली नाही. यामागे पहिलं कारण आहे की जेव्हा सिनेमा प्रदर्शित झाला तेव्हा मी दुबईत होता आणि सिनेमा तिथे प्रदर्शित केला गेला नाही. आणि जेव्हा मी भारतात आलो तेव्हा माझी सिनेमा पाहण्याची हिम्मतच झाली नाही एवढं मी सिनेमातील कथानकाविषयी इतरांकडून ऐकलं''.

सोनू निगम पुढे म्हणाला,''आता मी फक्त सिनेमाविषयी बोलतोय तरी मला रडायला येत आहे. हे केवळ काश्मिरबाबतीतच नाही तर मी असाही खूप भावूक आहे. मला इतरही कोणाबाबत काही चुकीच,दुःखद घडलं तर सहन होत नाही. म्हणूनच मी हा सिनेमा पाहण्याची हिम्मतच केली नाही''. सोनू निगमनं या मुलाखतीत दिल्लीचे मुख्यमंत्री अरविंद केजरीवाल यांच्यावरही निशाणा साधला. तो म्हणाला,''मी अरविंद केजरीवाल यांचं भाषण ऐकलं. ते त्या भाषणात काश्मिरी पंडितांची खिल्ली उडवत होतो. बीजेपीवर विनोद करीत होते, मला यासंदर्भात त्यांना काही बोलायचं नाही. पण काश्मिरी पंडितांवर त्यांचं बोलणं मला पटलं नाही''.

सोनू निगम म्हणाला,''अरविंद केजरीवाल म्हणाले असत्य घटना दाखवणाऱ्या सिनेमाचं स्वतःचा हेतु साधण्यासाठी प्रमोशन केलं जात आहे. ते ऐकताना खूप विचित्र वाटलं. असं असेल तर मग लोक सिनेमा पाहून रडत होते ते सिनेमात खोटं दाखवलं आहे म्हणून रडत होते का? काश्मिरी पंडितांवर अत्याचार झाला तेव्हा बीजेपीनं काय केलं. तुम्ही जेव्हा स्वतः बोलताय की अत्याचार झाला आणि मग दुसरीकडे विधानसभेत बोलता सिनेमात खोटं दाखवलं आहे''.