'जॅकलिन-सुकेश होते रिलेशनशिपमध्ये', वकीलाचा दावा

मनी लाँड्रिंग प्रकरणात बॉलिवूड अभिनेत्री जॅकलिन फर्नांडिस (jacqueline Fernandez) आणि अभिनेत्री नोरा फतेही (Nora Fatehi) यांना ईडीने समन्स पाठवला होता. २०० कोटींच्या मनी लाँड्रिंग प्रकरणात सुकेश चंद्रशेखर (Sukesh Chandrashekhar) हे मुख्य आरोपी आहेत. पण आता या प्रकरणाला नवीन वळण आलं आहे. जॅकलिन आणि सुकेश रिलेशनशिपमध्ये होते, असा दावा सुकेशचे वकिल अनंत मलिक यांनी केला आहे.यापूर्वी अंमलबजावणी संचालनालयाने (ईडी) जॅकलिनची दोनदा चौकशी केली आहे. तसेच याप्रकरणी अभिनेत्री नोरा फतेहीचाही जबाब नोंदवण्यात आला आहे.

सुकेशचे वकिल अनंत मलिक म्हणाले, "जॅकलिन फर्नांडिस आणि सुकेश एकमेकांना डेट करत होते. मी हे जे बोलतोय ते अगदी खरं आहे." नंतर नोरा विषयी बोलताना ते म्हणाले," नोरा फतेही स्वत:ला पीडित म्हणवत आहे, पण सत्य हे आहे की तिला BMW कार गिफ्ट करण्यात आली होती. खरं तर नोरा आणि जॅकलिन या दोघीही या प्रकरणातील महत्त्वाच्या दुवा आहेत, आणि त्यामुळेच त्यांना प्रश्नोत्तरासाठी बोलावले जात आहे."

मात्र, जॅकलिनच्या प्रवक्त्याने तिच्यावरचे आरोप फेटाळले आहेत. “जॅकलिन फर्नांडिसला ईडीने साक्षीदार म्हणून बोलावले आहे. तिने तिचे जबाब नोंदवले असून, ती यापुढेदेखील तपासकार्याला पूर्णपणे सहकार्य करेल." सोबतच जॅकलिनने सुकेश आणि तिच्या रिलेशनशिपबद्दल केलेल्या वक्तव्याला पूर्णपणे नकार दिला आहे. ”

पीएमएलए कायद्यातंर्गत जॅकलीनचे स्टेटमेंट नोंदवण्यात आल्याचे सूत्रांनी सांगितले. जॅकलीनचे आर्थिक व्यवहार आणि सुकेश चंद्रशेखरसोबत तिची ओळख यामुळे ती ईडीच्या रडारवर आहे. तर,ऑगस्टमध्ये, ईडीने सुकेशच्या काही जागांवर छापे टाकले होते,तेव्हा त्याचा चेन्नईतील बंगला, ₹ ८२.५ लाख रोख रक्कम आणि १२ आलिशान कार जप्त केल्या होत्या.