बबिता सोडणार 'तारक मेहता..'मालिका? चर्चांवर निर्मात्यांनी दिलं उत्तर

गेली कित्येक वर्षे प्रेक्षकांचे मनोरंजन करणाऱ्या 'तारक मेहता का उल्टा चश्मा' (taarak mehta ka ooltah chashmah) या मालिकेतील प्रत्येक भूमिकेला प्रेक्षकांची पसंती मिळाली आहे. या मालिकेतील बबिता ही भूमिका साकारणारी अभिनेत्री मुनमुन दत्ता (munmun dutta) ही अगदी सुरूवातीपासून यात काम करत आहे. या मालिकेमधील बबिता आणि जेठालाल या जोडीची सोशल मीडियावर नेहमी चर्चा होत असते. गेले काही दिवस मुनमुन ही मालिका सोडणार अशी चर्चा सुरू होती. यावर आता मालिकेच्या निर्मात्यांनी उत्तर दिलं आहे.(taarak mehta ka ooltah chashmah makers say about munmun dutta aka babita ji leaving show)

मालिकेच्या ‘मिशन कौवा’ या एपिसोडचे शूटिंग दमण येथे सुरू होते. त्यामुळे मालिकेच्या टिमला दमण येथे शिफ्ट करण्यात आले होते. या एपिसोडच्या शूटिंगमध्ये मुनमुन नव्हती. त्यामुळे तिने मालिका सोडल्याची चर्चा सुरू झाली. पण तारक मेहता मालिकेचे निर्माते असित कुमार मोदी यांनी एका मुलाखतीमध्ये सांगितले की, 'मालिकेमध्ये बबिताची भूमिका साकारणाऱ्या मुनमुन दत्ताबद्दल अशी अफवा पसरत आहे की, ती मालिका सोडणार आहे. हे खोटे आणि चुकीचे आहे.'

काही दिवसांपूर्वी मुनमुन तिच्या युट्यूब चॅनेलवरील एका व्हिडीओमुळे चर्चेत आली होती. या व्हिडीओमध्ये तिने जातीवाचक शब्द वापरले होते. याप्रकरणी सोशल मीडियावर तिच्याविरोधात तीव्र संताप व्यक्त केला जात होता. नंतर चूक लक्षात आल्याने मुनमुने सोशल मीडियावर माफीनामा सादर केला. या प्रकरणानंतर मुनमुन तारक मेहता मालिकेच्या सेटवर आली नव्हती.