'कशा असतात या बायका'; तेजश्री प्रधान का असं म्हणतेय? | Tejashree Pradhan

अभिनेत्री तेजश्री प्रधानने Tejashree Pradhan 'अग्गंबाई सासूबाई' या मालिकेत शुभ्राची भूमिका साकारत चाहत्यांची मनं जिंकली. या मालिकेनंतर काही काळ तिने ब्रेक घेतला आणि आता ती पुन्हा एकदा नव्या भूमिकेतून प्रेक्षकांच्या भेटीला आली आहे. घर-संसार आणि नोकरी अशी कसरत करणाऱ्या महिलांच्या आयुष्यावर आधारित 'कशा असतात या बायका' हा तिचा लघुपट नुकताच प्रदर्शित झाला आहे. या लघुपटात तेजश्री आणि अभिजीत खांडकेकर ही जोडी पहिल्यांदाच प्रेक्षकांना एकत्र पहायला मिळत आहे. तेजश्री, अभिजीतसोबतच 'कोटा फॅक्टरी' फेम मयुर मोरे यानेही भूमिका साकारली आहे. 'कॉटन किंग' प्रस्तुत या लघुपटाची कथा महिलांच्या मनाला स्पर्श करणारी आहे.

'कशा असतात या बायका' हा लघुपट फेसबुक, युट्यूब आणि इन्स्टाग्रामवर पहायला मिळणार आहे. या लघुपटाचं दिग्दर्शन वैभव पंडित आणि लेखन मोनिका धारणकर यांनी केलं आहे. "दिवाळीच्या निमित्ताने विशेषकरून महिलांच्या भावनांना अधोरेखित करणारा हा लघुपट आम्ही प्रेक्षकांच्या भेटीला आणला आहे. कुटुंब आणि करिअर अशी तारेवरची कसरत करणाऱ्या महिलांना हा लघुपट समर्पित आहे", असं वैभव पंडित म्हणाले.

'भावा बहिणीच्या नात्यातले नाजूक पदर उलगडणारी, एकमेकांना समजून घेत, एकमेकांच्या पाठीशी समर्थपणे उभी राहणारी ही नव्या जमान्यातील भावा बहिणीची जोडी.. आपल्या आयुष्यातील प्रत्येक स्त्रीची सर्व पातळ्यांवर लढण्याची आणि नाती जपण्याची सक्षमता दाखविणारी एक छोटीशी गोष्ट,' असं कॅप्शन देत तेजश्रीने लघुपटाचा हा व्हिडीओ पोस्ट केला आहे. या लघुपटात जरी भाऊबीजेची गोष्ट दाखवली असली तरी ही कथा केवळ बहिणीबद्दल नसून समाजातील बहुतांश महिलांची आहे.