Tiger Claw Case : वाघाच्या पंजाप्रकरणी 'बिग बॉस'च्या स्पर्धकाला अटक; अनेक सेलिब्रिटी अडचणीत, अभिनेत्यांच्या घरांची झडती

बंगळूर : ‘बिग बॉस’चा स्पर्धक वर्थूर संतोषला वाघाच्या पंजा प्रकरणात (Tiger Claw Case) अटक करण्यात आल्याने अनेक सेलिब्रिटी अडचणीत सापडले आहेत. दर्शन, रॉकलाइन व्यंकटेश, जग्गेश आणि निखिल कुमारस्वामी यांनी याआधी वाघाची नखे घातलेले फोटो दिले आहेत.

वाघाच्या पंजाप्रकरणी सेलिब्रिटींविरोधात (Celebrities) तक्रार दाखल केली होती. या पार्श्‍वभूमीवर वनविभागाच्या (Forest Department) अधिकाऱ्यांनी अनेक पथके तयार केली असून सेलिब्रिटींच्या घरांची झडती घेतली जात आहे. वन अधिकाऱ्यांनी अभिनेता दर्शनच्या आर.आर.नगर येथील घराची झडती घेतली.

मल्लेश्वरम्‌मधील अभिनेता जगेश आणि निर्माता रॉकलाइन व्यंकटेश यांच्या महालक्ष्मी लेआऊट येथील निवासस्थानावर वनविभागाच्या अधिकाऱ्यांनी छापा टाकून तपासणी केली. त्याचवेळी अधिकाऱ्यांनी तुमकूर जिल्ह्यातील कुनिगल तालुक्याच्या बिदनागेरे येथील शनैश्‍वर मंदिराचे धर्मदर्शी धनंजय गुरुजी यांच्या निवासस्थानावर छापा टाकला.

चिक्कमंगळूर जिल्ह्यातील कोप्पा येथील गौरीगड्डे आश्रमातील विनय गुरुजींचा वाघाच्या कातडीवर बसलेला फोटो व्हायरल झाला आहे. त्या पार्श्वभूमीवर त्यांच्या आश्रमाला भेट देऊन अधिकाऱ्यांनी पाहणी केली.