Trisha Krishnan Row: 'माणूस चुका करतो कारण...' मन्सूर खानच्या माफीनाम्यानंतर त्रिशाची पहिली प्रतिक्रिया

Trisha Krishnan Reacts To Mansoor Ali Khan's Apology: गेल्या काही दिवसांपासून साऊथ अभिनेत्री त्रिशा कृष्णन ही वेगळ्याच कारणामुळे चर्चेत आहे. तिचा आणि साऊथ स्टार विजयचा लिओ हा सिनेमा रिलिज झाला आणि त्याने बॉक्स ऑफिसवर धुमाकूळ घातला.

मात्र त्रिशा या चित्रपटामुळे नाही तर तिच्यावर एका अभिनेत्याने केलेल्या वक्तव्यामुळे चर्चेत आली आहे. अभिनेत्री त्रिशा कृष्णन आणि मन्सूर अली खान यांच्यात गेल्या काही दिवसांपासून वाद सुरू आहे.

मन्सूर अली खानने त्रिशावर आक्षेपार्ह टिप्पणी केल्यानंतर या वादाला सुरुवात झाली. त्यानंतर अनेक कलाकारांनी त्याच्यावर टीका केली आणि माफी मागण्याची विनंती देखील केली. मात्र मन्सूर अली खानने पुन्हा एक बेताल वक्तव्य केलं आणि तो माफी मागणार नसल्याचे सांगितले. त्यामुळे तो चांगलाच अडचणीत सापडला.

याप्रकरणी पोलिसांनी मन्सूरवरही कारवाई केली होती. त्यानंतर काल एक पोस्ट शेअर करत मन्सूरने त्रिशाची माफी मागितली. आता मन्सूरने मागितलेल्या माफीनंतर त्रिशाने देखील प्रतिक्रिया दिली आहे.

त्रिशा कृष्णनने ट्विटरवर मन्सूर अली खानच्या माफीबद्दल प्रतिक्रिया देणारी एक पोस्ट शेअर केली, ज्यात तिने लिहिले आहे- 'चुका करणं हा मानवी स्वभाव आहे आणि क्षमा करणे हा देवतांचा गुण आहे.' सध्या त्रिशा कृष्णनची ही पोस्ट सोशल मीडियावर व्हायरल झाली आहे.

तमिळ चित्रपटांमध्ये खलनायकाच्या भूमिका साकारण्यासाठी प्रसिद्ध असलेल्या मन्सूरनं काही दिवसांपुर्वी सांगितलं होतं की, 'लिओ' चित्रपटात त्रिशा कृष्णनसोबत कोणताही सीन केला नाही म्हणुन त्याला वाईट वाटले. त्याला वाटलं होतं, त्रिशासोबत त्याचा बेडरूम सीन असेल जिथे तो तिच्यासोबत बलात्काराचा सीन शुट करेल असं वक्तव्य मन्सूरने केल्यानंतर त्रिशाने इंस्टाग्रामवर नोट लिहत मन्सूर अलीसोबत पुन्हा काम करणार नसल्याचे सांगितले होते. त्यानंतर बराच वादही झाला.

मात्र नंतर मन्सूरचे प्रकरण पोलिसांपर्यंत पोहोचताच त्याने एक पोस्ट शेअर करत त्रिशा कृष्णनची माफी मागितली होती. आता त्रिशाने त्याला माफ केल्यानंतर हे प्रकरण मिटलं असल्याची चर्चा सुरु आहे.