माझी तुझी रेशीमगाठ: नेहासमोर येणार यशची खरी ओळख?

झी मराठी वाहिनीवरील 'माझी तुझी रेशीमगाठ' (Mazhi Tuzhi Reshimgaath) ही मालिका सध्या खूप गाजतेय. त्यामधील श्रेयस तळपदे (Shreyas Talpade) आणि प्रार्थना बेहरेची (Prarthana Behere) जोडी आणि छोट्या परीचा निरागस अभिनय याची चर्चा घराघरात होतेय. मालिकेत अनेक दिग्गज कलाकारांची फौज आहे. मालिकेच्या कथानकाच्या प्रेक्षकांना खिळवून ठेवलं आहे. सध्या मालिकेत प्रेक्षकांनी पाहिलं की परांजपे याचं खरं रूप सगळ्यांसमोर येत आणि नेहाशी त्यांचं लग्न मोडतं. यशच्या मनात नेहाबद्दल प्रेम आहे या भावनेची जाणीव तर यशला झाली आहे, पण नेहासमोर ते प्रेम व्यक्त करण्याची हिंमत तो करत नाही. अनेकदा आपली खरी ओळख नेहाला सांगण्याचा प्रयत्न यश करतो पण ते ही अशक्य होतं. परांजपे यशचा वचपा काढण्यासाठी यशच्या आधीच नेहाला त्याची खरी ओळख सांगतो आणि नेहाला या गोष्टीचा धक्का बसतो.

दुसरीकडे समीर यशला नेहासमोर त्याच्या मनातील भावना व्यक्त करण्यासाठी आग्रह करतो. यश नेहाला सगळं खरं सांगण्याचं मनाशी पक्क करतो. पण त्याच्याआधीच नेहाला यशाची खरी ओळख पटली आहे. त्यामुळे नेहा आता यशची बाजू ऐकून घेईल का, यश नेहासमोर त्याच्या मनातील भावना व्यक्त करू शकेल का, नेहा आणि यशचं मैत्रीचं नातं प्रेमात बदलेल की तिथेच संपेल, हे प्रेक्षकांना आगामी भागात पाहायला मिळेल.

श्रेयस यामध्ये यशची भूमिका अत्यंत चोख साकारतोय. तसंच या मालिकेमध्ये त्याच्यासोबत प्रार्थना बेहरे ही नेहा कामतची भूमिका साकारताना दिसतेय. मालिकेत दिग्गज कलाकारांची फौज असताना मात्र सगळ्यांचं लक्ष वेधून घेतेय ती म्हणजे बाल कलाकार मायरा वायकुळ. मायरा हिने या मालिकेत परीची भूमिका साकारली आहे. सोशल मीडियावर आधीच स्टार ठरलेली चिमुकली मायरा मालिकेच्या एका एपिसोडसाठी दहा हजार रुपये मानधन घेत असल्याचं समजतंय. चार वर्षांची असणारी मायरा टिकटॉक स्टार असून तिच्या टिकटॉक वरील व्हिडीओला नेटकऱ्यांची पसंती मिळाली होती.