साऊथ स्टार विजय देवरकोंडा म्हणाला,''वाट लगा दुंगा'';पहा 'लायगर'चा टीझर

साऊथचे सिनेमे म्हणजे 'लार्जर दॅन लाईफ' असं केलेलं चित्रिकरण,स्टायलिश कलाकार,त्यांची लक्षात राहिल अशी हटके संवादबाजी,प्रत्येक बीट्सवर थिरकायला लावतील अशी गाणी,आपल्या डोळ्यांना ३६० डिग्रीत फिरायला लावणारी फायटिंग किंवा स्टंटबाजी असं सगळं ए-वन ठासून भरलेलं असंत. म्हणूनच तर भाषा कळली नाही तरी साऊथचा सिनेमा मोठ्या उत्साहाने पाहणारे अनेक. त्यामुळेच बॉलीवूडलाही तिथल्या कथानकाची आणि स्टार्सची भुरळ पडणं यात काही नाविन्य नाही. आजपर्यंत बॉलीवूडमध्ये रजनीकांत,कमल हासन,नागार्जुन,धनुष अशा अनेक साऊथ स्टार्सनी आपलं नाणं खणखणीत वाजवून दाखवलंय. आता साऊथचा आणखी एक स्टार,हॅन्डसम हंक विजय देवरकोंडानंही दणदणीत एन्ट्री केलीय. त्याच्या 'अर्जुन रेड्डी' शाहिदचा 'कबिर सिंग' बनला अनं शाहिद रातोरात बॉलीवूडच्या नंबर वन पदावर विराजमान झाला होता. असो,असा हा 'अर्जुन रेड्डी' म्हणजे विजय देवरकोंडानं(Vijay Deverakonda) बॉलीवूडमध्ये पुरी जगन्नाथ दिग्दर्शित आणि धर्मा प्रॉडक्शन सहनिर्मित 'लायगर' सिनेमातनं पदार्पण करायचं ठरवलं अनं सर्वांनाच सिनेमाच्या फर्स्ट लूक पाहण्याचे वेध लागले.

ही प्रतिक्षा संपली कारण सिनेमाचा टीझर रीलीज झालाय बरं का. 'लायगर' सिनेमात विजय देवरकोंडाने मुंबईचा स्ट्रीट फायटर जो पुढे जागतिक दर्जाच्या एमएमए फायटरपर्यंत मजल मारतो अशी फायटरची भूमिका साकारलीय. या सिनेमाचा टीझर रिलीज झाला अनं लगोलग लाखो चाहत्यांच्या पसंतीचा मानकरी ठरला. यात विजयच्या तोंडातील 'वाट लगा दूंगा' हा डायलॉग तो टोटल मुंबईकर असल्याचा भास करवून देतोय. कारण अहो,सिनेमात तो मुंबईच्या स्लम एरियात वाढलेला मुलगा दाखवलाय. त्यामुळे टोटल बम्बय्या वाटलाच पाहिजे नाही का. या सिनेमात त्याच्यासोबत रम्या कृष्णन, रॉनित रॉय, विशू रेड्डी, अली, मकरंद देशपांडे हे कलाकारही महत्त्वाच्या भूमिकेत दिसणार आहेत. तर टायगर श्रॉफसोबत 'स्टुडंट ऑफ द इयर 2' सिनेमाद्वारे बॉलिवूडमध्ये पदार्पण करणारी अनन्या पांडे या साऊथ स्टार विजय देवरकोंडासोबत रोमान्स करताना दिसणार आहे.

विजय देवरकोंडा यानं 'लायगर' सिनेमाचा व्हिडीओ ट्वीटरवर शेअर केला होता. त्याचं ट्वीट इथे जोडलेलं आहे. सिनेमाचा टीझर या व्हिडीओच्या माध्यमातनं नक्की पहा.

'लायगर' सिनेमाची टीम शूटच्या शेवटच्या टप्प्यात आहे. त्यांनी दुबई, यूएस आणि लॉस वेगासमध्ये सिनेमाचे बरेचसे चित्रीकरण केले आहे. 25 ऑगस्ट 2022 रोजी हा सिनेमा सर्व भाषांमध्ये जगभरातील सिनेमाघरांमध्ये दाखल होईल. या स्पोर्ट्स ड्रामामध्ये विजय देवरकोंडा पूर्वी कधीही न पाहिलेल्या अवतारात दिसणार आहे. फर्स्ट लूक पाहून तरी हा साऊथ स्टार बॉलीवूडच्या भल्या भल्या हिरोंना पाणी तर पाजणार नाही ना या चर्चेला मात्र उधाण आलंय.