पत्नीच्या गंभीर आरोपांमुळे चर्चेत आलेला करण डॉमिनॉज'मध्ये करायचा काम

'ये रिश्ता क्या कहलाता है' Yeh Rishta Kya Kehlata Hai या मालिकेत नैतिकची भूमिका साकारत अभिनेता करण मेहरा Karan Mehra घराघरात पोहोचला. या मालिकेतील करणच्या भूमिकेला प्रेक्षकांची पसंती मिळाली होती. मात्र अभिनय क्षेत्रात पदार्पण करण्यापूर्वी करण एका फास्ट फूड आऊटलेटमध्ये काम करायचा. सोशल मीडियावर व्हिडीओ पोस्ट करत खुद्द करणनेच याबद्दल सांगितलं होतं. गेल्या वर्षी लॉकडाउनमध्ये करणने हा व्हिडीओ पोस्ट केला होता. ज्यामध्ये तो पिझ्झा बनवताना दिसत आहे. बारावीच्या परीक्षांनंतर फास्ट फूड आऊटलेटमध्ये ट्रेनी म्हणून काम करायला सुरुवात केल्याचं करणने या व्हिडीओमध्ये सांगितलं होतं. फ्रेंच फ्राइज बनवतानाचा फोटोसुद्धा त्याने सोशल मीडियावर पोस्ट केला होता. (Yeh Rishta fame Karan Mehra reveals he worked at a fast food outlet before acting)

'बारावीनंतर डॉमिनॉजमध्ये ट्रेनी म्हणून कामाला लागलो आणि पहिल्या नोकरीत मी पिझ्झा कसा बनवायचा ते शिकलो. आज जेव्हा मी मागे वळून पाहतो, तेव्हा शिकलेली प्रत्येक गोष्ट आयुष्यात कामी आल्याचं जाणवतं. अजूनही घरात मी पिझ्झा आणि फ्रेंच फ्राइज बनवायला शिकतोय', असं कॅप्शन त्याने दिलं होतं.

गेल्या काही दिवसांपासून करण त्याच्या खासगी आयुष्यामुळे फार चर्चेत आहे. पत्नी निशा रावलने करणवर कौटुंबिक हिंसाचाराचे आरोप केले. तिने दाखल केलेल्या तक्रारीनंतर करणला अटकसुद्धा झाली होती. छोट्या पडद्यावरील ही लोकप्रिय जोडी घटस्फोट घेणार असून गेल्या काही दिवसांपासून त्यांच्या आयुष्यात बरेच वादविवाद निर्माण झाले आहेत.