भावी नगरसेवक म्हणताहेत काळजी करू नका, सावध राहा 

औरंगाबाद : वॉर्डाची रचना, आरक्षण झाल्यापासून इच्छुक उमेदवार कामाला लागले आहेत. कित्येकांनी डोअर टू डोअर गाठीभेटीची एक-दोन फेऱ्यासुद्धा पूर्ण केल्या आहेत. आता कोरोनाच्या पार्श्‍वभूमीवर भावी नगरसेवकांच्या कार्यक्रमांना काहीसा ब्रेक लागलेला असला तरी इच्छुकांनी कोरोनाची संधी साधत आपल्या वॉर्डात कोरोनाच्या जनजागृतीसाठी सर्वत्र होर्डिंग्ज लावले आहेत.

काय काळजी घ्यावी, सुरक्षित राहण्यासाठी काय करावे, याची पत्रके वाटणेही काहींनी सुरू केले आहे. काही जणांनी सोशल मीडियावरून आपल्या वॉर्डातील मतदारांना माहिती देण्यास सुरवात केली आहे.

सध्या बहुतांश वॉर्डांत प्रमुख पक्षांकडून डझनभर इच्छुक उमेदवार आहेत. सर्वसाधारण वॉर्डात तर याची संख्या वीसच्या पुढे आहे. प्रत्येक पक्षाकडून उमेदवारांची संख्या लक्षणीय असताना त्यांच्या स्पर्धासुद्धा तीव्र आहेत. आपल्याला तिकीट मिळो अथवा न मिळतो मैदानात उतरणार असा चंग अनेकांनी बांधला असून, डोअर टू डोअर प्रचार केला जात आहे.

हेही वाचा - ऑनर किलिंग ः प्रियसीचा पिता, चुलत्याच्या हल्ल्यात प्रियकराच्या भावाचा मृत्यु

काही जणांनी आपण कोणत्या पक्षाकडून इच्छुक आहे हेसुद्धा सांगितले आहे. त्याची पत्रकेसुद्धा वाटली आहेत. सध्या सर्वत्र कोरोनाची चर्चा असताना आता भावी नगरसेवकांनी त्यांच्या वॉर्डात कोरोनाच्या जागृतीसाठी बॅनर लावले आहेत. या बॅनवर ‘काळजी करू नका सावध राहा, साबण व पाणी वापरून आपले हात स्वच्छ धुवा, शिंकताना आपल्या नाकावर, तोंडावर रुमाल धरा. सर्दी, ताप असलेल्यांनी डॉक्टरांशी संपर्क करावा’, अशा सूचना लिहिल्या आहे.

सध्या भावी नगरसेवकांकडून त्यांच्या वॉर्डातील रहिवाशांना चांगली माहिती मिळत आहे. शिवाय यामध्ये नागरिकांनी राष्ट्रीय कॉल सेंटर, राज्यनियंत्रण कक्ष, टोल फ्री हेल्पलाइन यांच्याशी संपर्क करण्यासाठी नंबरसुद्धा दिलेले आहेत.