जालना : जिल्हा बँकेकडून शंभर टक्के अनुदान वितरण

जालना : शासनाकडून प्राप्त झालेल्या अनुदानाची रक्कम द जालना जिल्हा मध्यवर्ती सहकारी बँकेकडून शेतकऱ्यांना ९९.९३ टक्के वितरित करण्यात आली. यात अतिवृष्टी, पीकविमा, हवामान आधारित फळबाग विमा आदींच्या अनुदान रक्कमेचा समावेश आहे.

यंदा जिल्हा मध्यवर्ती सहकारी बँकेकडे खरीप हंगामातील अतिवृष्टीमुळे नुकसानी पोटी शासनाकडून जिल्ह्यातील ९८७ गावांमधील तीन लाख ७३ हजार २८७ शेतकऱ्यांचे २४५ कोटी ४८ लाख रुपये जमा झाले होते. त्यापैकी जिल्हा बँकेकडून तीन लाख ४६ हजार २१० शेतकऱ्यांच्या २३२ कोटी ५९ लाखांचे अनुदान वितरित करण्यात आले आहेत.

पीकविमा कंपनीकडून अतिवृष्टीच्या नुकसानी पोटी ६३ हजार ७६१ शेतकऱ्यांचे ३५ लाख ३७ हजार रुपये जमा झाले होते. त्यापैकी जिल्हा बँकेकडून आतापर्यंत ६२ हजार २२४ शेतकऱ्यांना ३५ लाख चार हजार रुपयांचे अनुदानाची रक्कम वितरित करण्यात आली आहे. हवामान आधारित फळबाग विमा नुकसान भरपाईचे चार हजार ३७ फळबाग शेतकऱ्यांचे १२ लाख ११ हजार रुपये जिल्हा बँकेकडे जमा झाले होते. आतापर्यंत जिल्हा बँकेने चार हजार ३२६ लाभार्थी शेतकऱ्यांना १२ लाख रुपयांचे अनुदान वाटप केले आहे. त्यामुळे आतापर्यंत जिल्हा बँकेने अनुदानाची आलेली रक्कमेपैकी ९९.९३ टक्के रक्कम शेतकऱ्यांना वाटप केली आहे.

शासनाकडून तसेच विमा कंपनीकडून खरिपातील अतिवृष्टीचे आलेल्या अनुदानाची रक्कम जिल्हा मध्यवर्ती सहकारी बँकेच्या ६४ शाखांच्या माध्यमातून शेतकऱ्यांना वितरित करण्यात आली. आतापर्यंत ९९.९३ टक्के अनुदानाची रक्कम शेतकऱ्यांना वितरित केली आहे. वर्ष २०२०-२१ या आर्थिक वर्षात बँकेच्या उत्कृष्ट कामकाजाबद्दल विविध पारितोषिकही मिळाली आहेत.

- आशुतोष देशमुख, कार्यकारी संचालक, द जालना जिल्हा मध्यवर्ती सहकारी बँक, जालना

बँकेच्या कारभाराबद्दल विविध पारितोषिक

जिल्हा बँकेचा कारभारात चांगली सुधारणा झाली आहे. त्यामुळे बँकाचे आणि संचालका मंडळाचा देशापातळीवरही गौरव करण्यात आला आहे. वर्ष २०२०-२१ मध्ये जिल्हा बँकेला फ्रंटियर को-ऑपरेटिव्ह बॅंक्स्‌ असोसिएशनकडून बेस्ट ईन्फ्रास्टक्चर प्लॅन या वर्गवारीत पारितोषिक चक देऊन बँकेचा गौरव करण्यात आला; तसेच बेस्ट को-ऑपरेटिव्ह बँक, बेस्ट एच आर ईनोव्हेशन बँक, बेस्ट टर्नअराऊंड बँक या श्रेणीतील मानांकित पारितोषिक ही बँकेला देऊन बँकेच्या कामकाजाचा गौरव करण्यात आला आहे.