Bidkin News : पेरू खाण्यासाठी गेलेल्या १८ वर्षीय तरुणीचा विजेचा शॉक लागून विहिरीत पडुन मृत्यू

- रविंद्र गायकवाड

बिडकीन - येथील पोलिस ठाणे हद्दीतील पाडळी (गाझीपुर) येथील पाडळी शिवारातील एका विहिरीत पाय घसरून १८ वर्षीय तरुणीचा मृत्यू झाल्याची घटना आज (ता. ०७) सोमवार रोजी दुपारच्या वेळी घडली आहे.

मृत्यु झालेल्या तरुणीचे नाव पुजा सुरेश हुड (वय १८ वर्षे), रा. पाडळी, ता. पैठण असे मयत झालेल्या तरुणीचे नाव आहे. याबाबत पोलिसांनी दिलेल्या माहितीनुसार पाडळी शिवारातील घरच्या शेतात काम करण्यासाठी गेली असता शेजारी असलेल्या गट क्रमांक १४२ मधील रामकिसन हुड यांच्या मालकीचे शेतात विहीरीच्या जवळच पेरु खाण्यासाठी गेली असता विजेचा जोरदार धक्का बसला व पाय घसरुन तोलजात विहिरीत पडली आहे.

याबाबत पाडळी येथील नागरिकांनी व नातेवाईकांच्या वतीने पोलिसांना माहिती मिळताच पोलिस निरीक्षक प्रमोद पाटील यांच्या मार्गदर्शनाखाली पोलिस हेड कॉन्स्टेबल संजिवन कदम, पोलिस सहायक फौजदार सोमनाथ तांगडे व पोलिस कर्मचारी यांनी घटनास्थळी धाव घेतली असता विहीरीत मोठ्या प्रमाणावर पाणी असल्याने अग्निशमक दलाच्या जवानांना पाचारण करण्यात आले होते. तब्बल ०१ तास अथक परिश्रम घेत अग्निशमन दलाच्या जवानांनी मृतदेह बाहेर काढण्यात यश मिळवला आहे.

यावेळी नातेवाईकांच्या वतीने पुजा हुड हिला ग्रामीण रुग्णालय बिडकिन येथे दाखल केले असता वैद्यकीय अधिकारी डॉ प्रणिता मात्रे यांनी मयत घोषित केले असुन शवविच्छेदन करण्याची प्रक्रिया सुरू झाली होती. मृतदेह विहिरीबाहेर काढण्यासाठी पद्मपुरा अग्निशमन केंद्र पथकाचे मुख्य अग्निशमन अधिकारी रायबा पाटील यांच्या मार्गदर्शनाखाली उप अग्निशमन अधिकारी विजय राठोड, लक्ष्मण कोल्हे, अग्निशमन जवान प्रसाद शिंदे, छत्रपती केकान, सचिन शिंदे, विक्रांत बकले,चालक चंद्रसेन गीते यांनी अथक परिश्रम घेत मृतदेह विहिरीबाहेर काढला आहे.

बिडकीन पोलिस ठाणे येथे अकस्मात मृत्यूची नोंद करण्यात आली असून, पुढिल तपास पोलिस निरीक्षक प्रमोद पाटील यांच्या मार्गदर्शनाखाली पोलिस उपनिरीक्षक अशोक माने, पोलिस हेड कॉन्स्टेबल संजिवन कदम हे करित आहेत.