येलदरी धरणात ५७ टक्के पाणीसाठा

जिंतूर (जि. परभणी) - काही दिवसापासून तालुक्यात पडत असलेल्या पावसामुळे पूर्णा पाटबंधारे विभागाच्या येलदरी (ता. जिंतूर) येथील धरणाच्या जलाशयात मंगळवारी सकाळी ५७.१४ टक्के उपयुक्त पाणीसाठा उपलब्ध झाला. जिंतूर तालुक्यात व धरणाच्या पाणलोट क्षेत्रात गेले काही दिवसांपासून कमीजास्त प्रमाणात रोज पाऊस पडत असून धरणाच्या पाणीपातळीत हळूहळू वाढ होत आहे.

धरणाच्या प्रकल्पिय पाणी साठ्याच्या क्षमतेनुसार जलाशयातील मृतसाठा १२४.६७० दशलक्ष घनमीटर असून जिवंत पाणीसाठा ८०९.७७० दशलक्ष घनमीटर एवढा आहे. प्राप्त माहितीनुसार मंगळवारी (ता. १२) सकाळी आठपर्यंत धरणात ४६३.०१६ दलघमी उपयुक्त पाणीसाठा तर एकूण ५८७.६८६ दलघमी पाणीसाठा उपलब्ध असून जलाशयातील पाणीपातळी ४५७.९८० मीटर आहे. ज्यामध्ये जिवंत पाणीसाठ्याची टक्केवारी ५७.१४ एवढी आहे.धरणात मागील २४ तासात ०.३८२ दशलक्ष घनमीटर पाण्याची आवक झाली असून हळूहळू आवक सुरूच आहे.