छत्रपती संभाजीनगर : शहराला पाणीटंचाईतून तात्पुरता दिलासा देण्यासाठी जायकवाडी ते नक्षत्रवाडी दरम्यान ९०० मिलिमीटर व्यासाची जलवाहिनी टाकण्यात आली. या जलवाहिनीची चाचणी घेतली जात असून, त्यानंतर जलवाहिनी धुण्यात येणार आहे. त्यासाठी तब्बल पन्नास लाख लिटर पाणी लागण्याची शक्यता आहे. त्यामुळे ऐन उन्हाळ्यात पाणीपुरवठ्याला फटका बसणार आहे.
शहरासाठी शासनाने मंजूर केलेल्या २७४० कोटी रुपयांतून २५०० मिलिमीटर व्यासाच्या पाणी योजनेचे काम सुरू आहे. मात्र, ही योजना पूर्ण होण्यासाठी वेळ लागणार आहे. तोपर्यंत शहराला पाणीटंचाईतून थोडासा दिलासा मिळावा यासाठी जुन्या ७०० मिलिमीटर व्यासाच्या पाणी योजनेचे पुनरुज्जीवन करून त्याजागी ९०० मिलिमीटर व्यासाची पाइपलाइन टाकण्यात आली आहे. हे कामदेखील महाराष्ट्र जीवन प्राधिकरणाच्या माध्यमातून करण्यात आले आहे. जलवाहिनीचे काम पूर्ण झाल्यानंतर चाचणी घेतली जात आहे. योजना पूर्ण झाल्यानंतर सुरवातीला रोज २५ एमएलडी तर चार हजार अश्‍वशक्तीचे पंप बसल्यानंतर रोज ७५ एमएलडी पाणी वाढणार असल्याचा दावा केला जात आहे.
फारोळ्यात आले होते गढूळ पाणी
या योजनेची टप्प्या-टप्प्याने चाचणी घेतली जात आहे. पहिल्या टप्प्यात फोरोळा जलशुद्धीकरण केंद्रापर्यंत चाचणी घेण्यात आली. त्यावेळी मोठ्या प्रमाणावर गढूळ पाणी जलशुद्धीकरण केंद्रात आले. हे पाणी शुद्ध करण्यासाठी महापालिकेला केमिकलची मात्रा वाढवावी लागली. पण, नक्षत्रवाडीर्यंतच्या चाचणीनंतर पाइपलाइन धुण्यासाठी वापरले जाणारे पाणी नाल्यात सोडून द्यावे लागणार आहे.
या योजनेतून शहरासाठी पाणीपुरवठा सुरू करण्यापूर्वी जलवाहिनी पूर्णपणे धुतली जाणार आहे. जलवाहिनी धुण्यासाठी किमान पन्नास लाख लिटर पाणी लागेल. जलवाहिनी स्वच्छ केल्याशिवाय शहरवासीयांना योजनेतून पाणी पुरवठा करणे शक्य नाही.
— दीपक कोळी,
कार्यकारी अभियंता, जीवन प्राधिकरण
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
