Chhatrapati Sambhajinagar : समोरून ट्रक आल्याने बस चिखलात रुतली, ७० प्रवासी थोडक्यात वाचले

सोयगाव : राज्य परिवहन महामंडळाच्या सोयगाव आगाराची बनोटी-जळगाव बस (क्रमांक एम एच २० बीएल २२८६) ही बस ६० ते ७० प्रवाशी घेऊन गुरुवारी (ता.११) जळगावकडे जात होती. सोयगाव-शेंदुरणी रस्त्यावर समोर ट्रक आल्याने बस रस्त्याच्या कडेला उतरून चिखलात फसली.

सुदैवाने कोणतीही जीवितहानी न होता मोठा अनर्थ टळला. ही घटना गुरुवारी सकाळी सव्वाआठच्या सुमारास घडली. सरकारने महिलांना बस भाड्यामध्ये दिलेली पन्नास टक्के सवलत, ७५ वर्षावरील नागरिकांना मोफत प्रवास यामुळे बस गाड्यांमध्ये प्रवाशांची संख्या अधिक असते.

राज्य परिवहन महामंडळाच्या बसमधून ५६ प्रवाशी वाहतूक करण्याची परवानगी असताना क्षमतेपेक्षा जास्त प्रवासी वाहतूक केली जाते. सर्वसामान्यांच्या जीवाशी खेळ सुरू असून याकडे परिवहन महामंडळाच्या अधिकाऱ्यांचे दुर्लक्ष झालेले आहे. मुख्य रस्त्यावरील साइड पट्ट्यांचे काम निकृष्ठ झाल्यामुळे बस उलटल्याचे प्रवाशांनी सांगितले.