औरंगाबाद : माजी सभापतीसह १८ संचालकांना नोटिसा

औरंगाबाद : कृषी उत्पन्न बाजार समितीत तत्कालीन सभापती राधाकिसन पठाडे आणि संचालक मंडळाच्या दोन वर्षांच्या कार्यकाळातील ८८.८३ कोटींच्या खर्चाची चौकशी करण्यात आली. यात बाजार समितीच्या कामकाजात अनियमितता व काहीअंशी आर्थिक नुकसान या बाबींसाठी कारणीभूत सभापती,संचालक मंडळ जबाबदार असल्याचे सिद्ध झाले आहे. यामुळे माजी सभापतीसह १८ संचालकांना जिल्हा उपनिबंधक कार्यालयातर्फे नोटिसा पाठविण्यात आल्या आहेत.

हातमाळी ता.जि.औरंगाबाद येथील शेतकरी ज्ञानेश्‍वर बाजीराव म्हस्के यांनी पणन संचालकांकडे माजी सभापती यांच्या कार्यकाळातील ८८.८३ कोटींच्या कामाबाबत तक्रार दिली होती. यानुसार तत्कालीन महाविकास आघाडी सरकारने चौकशी अधिकारी तथा जिल्हा उपनिबंधक डॉ. मुकेश बारहाते यांनी याची चौकशी करून त्याचा अहवाल हा पणन संचालक आणि राज्य सरकारला सादर केला होता.

सरकारतर्फे हा अहवाल जिल्हा उपनिबंधक अनिलकुमार दाबशेडे यांच्याकडे आला असून त्यांनी तक्रार तसेच ज्यांच्यावर ठपका ठेवला आहे, त्यांना पाठवून त्यांचे उत्तरही मागवले आहे. यात २५ विषयांवर ही तक्रार करण्यात आली होती. त्यानुसार यांची चौकशी करण्यात आली त्यानंतर बाजार समितीच्या कामकाजात अनियमितता व काहीअंशी आर्थिक नुकसान अढळून आले आहेत. यामुळे आता या संचालकांना नोटीसाच्या माध्यमातून खुलासे मागण्यात आले आहेत.

या संचालकांना पाठवली नोटीस

माजी सभापती राधाकिसन पठाडे, माजी उपसभापती भागचंद ठोंबरे, माजी सभापती संजय औताडे, संचालक विकास दांडगे, गणेश दहिहंडे, नारायणराव मते, रघुनाथ काळे, दामोदर नवपूते, अलका दहीहंडे, संगीता मदगे, दत्तू तारो, शिवाजी वाघ, रामभाऊ शेळके, राहुल सावंत, बाबासाहेब मुगदल, प्रशांत रमेश चंद्रसोकीया, हरी दायमा,देविदास किर्तीशाही यांना नोटिसा पाठविण्यात आल्या आहेत.

हातमाळी येथील ज्ञानेश्‍वर म्हस्के यांच्या तक्रारीनूसार चौकशी करण्यात आली. याचा अहवाल आला असून या संदर्भात ज्यांच्यावर आरोपी होता. त्या सर्वांना नोटीसा पाठवून त्यांच्याकडून त्यांचे म्हणणे मागविण्यात आले आहेत.२९ जूलै पर्यंत या सर्व संचलकांनी म्हणणे मांडावे लागणार आहे.

- अनिलकुमार दाबशेडे, जिल्हा उपनिबंधक

विद्यमान मुख्य प्रशासकाने त्यांच्या मामाच्या माध्यमातून ही तक्रार दिली आहे. केवळ आमच्या संचालक मंडळास मुदत वाढ मिळू नयेत म्हणून ही तक्रार केली होती. चौकशी कुठलाही भ्रष्टाचार झालेला नाही असा अहवाल आला आहे. आम्ही जर भ्रष्टाचार केला असेल, तर गुन्हे दाखल झाले असते.आमचे काम स्वच्छ आहेत.

-राधाकिसन पठाडे, माजी सभापती, बाजार समिती