कन्नडमध्ये गादी घराला लागली आग, लाखोंचे नुकसान

कन्नड(जि.औरंगाबाद) : कन्नड शहरातील समर्थनगर येथील गादी घराला आग लागून लाखो रुपयांचे साहित्य जाळून खाक झाले. ही घटना शुक्रवारी (ता.नऊ) घडली. शहरातील दस्तगीर मंसुरी यांचा शहरात गादी, ताडपत्री व इतर साहित्याचा मोठा व्यवसाय आहे. शुक्रवारी सायंकाळी पाच वाजेच्या सुमारास गादी घराला आग लागली. त्यात हजारो नवीन गाद्या, कापूस, लग्नसराईसाठी विक्रीसाठी आणून ठेवलेल्या रग, दुलई, पावसाळी हंगामासाठी आगाऊ स्टोअर करून ठेवलेले प्लास्टिक कागद, ताडपत्रीसह इतर साहित्य जळून खाक झाले.

धरसोड वृत्तीतून घेतलेल्या निर्णयांमुळे महाराष्ट्रात कोरोनाचा प्रकोप वाढला - भागवत कराड

शहराच्या मध्यवस्तीत असलेल्या या ठिकाणाहून आगीचे व धुराचे मोठे लोळ उठत होते. परिसरातील नागरिकांनी मिळेल तेथून पाणी उपलब्ध करून आग विझविण्याचा प्रयत्न केला. शॉर्ट सर्किटमुळे आग लागल्याचा प्राथमिक अंदाज आहे. या आगीत दोघांना किरकोळ जखमा वगळता कोणतीही जीवित हानी झाली नाही. 

संपादन - गणेश पिटेकर