हे वागणं बरं नव्ह! दोघे पोलिस कर्मचाऱ्यांचे केवळ पाचशे रुपयांवरुन रस्त्यावर कपडे काढून तुंबळ हाणामारी

सोयगाव (जि.औरंगाबाद) : सोयगाव तालुक्यात कोरोना संसर्गाच्या दुसऱ्या लाटेने प्रवेश केला असतानाच कायदा सुव्यवस्थेची जबाबदारी असलेल्या सोयगाव पोलिस ठाण्याच्या दोन पोलिस कर्मचाऱ्यांत रविवारी (ता.सात) पाचशे रुपयांच्या देवाण-घेवाणीतून ठाण्यातच हाणामारी झाल्याने तालुक्यात खळबळ उडाली आहे. याबाबत अधिक माहिती अशी की, चौधरी व शिंदे या दोन कर्मचाऱ्यांत पाचशे रुपयांच्या देवाण-घेवाणीवरून सोयगाव बायपास रस्त्यावर कपडे काढून तुंबळ हाणामारी झाली. त्यानंतर त्यांची समजूत काढत सहकाऱ्याने पोलिस ठाण्यात आणले.

पुण्याहून गावाकडे आईला भेटायला चाललेल्या मुलाचा भीषण अपघातात मृत्यू

मात्र, पोलिस ठाण्यात पुन्हा या दोघांमध्ये जोरदार हाणामारी झाली. या हाणामारीत चौधरी नावाचा कर्मचारी गंभीर जखमी झाला आहे. त्यांना बनोटी दुरक्षेत्राचे बिट जमादार दिलीप तडवी यांनी उपचारासाठी सोयगाव येथील ग्रामीण रुग्णालयात दाखल केले. ग्रामीण रुग्णालयाच्या वैद्यकीय अधिकाऱ्यांनी प्राथमिक उपचार करून पुढील उपचारासाठी सिल्लोड येथील शासकीय रुग्णालयात पाठविण्यात आले आहे. ग्रामीण रुग्णालयाच्या वैद्यकीय सूत्रांनी न्याय वैद्यकीय तक्रार सोयगाव पोलिस ठाण्यात दिली आहे. मात्र, अद्यापही गुन्हा दाखल करण्यात आलेला नाही.

चौकशी करून कारवाई
याबाबत सोयगाव पोलिस ठाण्याचे सहायक पोलिस निरीक्षक सुदाम शिरसाठ यांच्याशी संपर्क साधला असता दोघांचे वैयक्तिक भांडण आहे. तरीही पोलिसांमध्ये झालेल्या मारहाणीबाबत चौकशी करून कार्यालयीन कारवाई करण्यात येईल असे सांगितले.

संपादन - गणेश पिेटेकर