औरंगाबाद जिल्हा बँकेतही ‘शिंदेशाही’!

औरंगाबाद : गेल्या अनेक दशकापासून काँग्रेसच्या ताब्यात असलेली जिल्हा मध्यवर्ती सहकारी बँक पहिल्यांदाच शिवसेनेच्या ताब्यात आली होती. यामुळे बँकेवर भगवा फडकला. माजी राज्यमंत्री अब्दुल सत्तार गटाचे अध्यक्ष आणि उपाध्यक्ष बँकेवर आहेत. यासह संदीपान भुमरे गटाचेही संचालक मंडळ आहे. यामुळे महाविकास आघाडीच्या ताब्यात असलेल्या बँकेवर आता शिंदे सरकारचे वर्चस्व राहणार आहे.

जिल्हा बँकेत २० संचालक आहेत. यात शिवसेनेचे १० संचालक आहेत. त्यापैकी आमदार अंबादास दानवे, कृष्णा पाटील डोणगावकर, देवयाणी डोणगावकर हे तीन सोडल्यास बाकीचे सात संचालक हे आमदार अब्दुल सत्तार आणि भुमरे गटाचे आहेत. तर पाच संचालक भाजपचे आहेत. राष्ट्रवादीचे दोन, कॉंग्रेसचे तीन आणि नितीन पाटील यांच्या गटाचा एक अपक्ष आहे. या बँकेची निवडणूक झाल्यानंतर अध्यक्ष-उपाध्यक्ष निवडीच्या वेळी आमदार सत्तार-भुमरे आणि आमदार दानवे यांच्यात चांगलेच बिनसले होते.

अध्यक्ष नितीन पाटील व उपाध्यक्ष अर्जून गाढे यांच्या माध्यमातून अब्दुल सत्तार यांनी बँक आपल्या ताब्यात ठेवली आहे. यामुळे ज्या-गटात सत्तार तिकडेच बँक राहील अशी सध्याची स्थिती आहे. महाविकास आघाडीत बघितल्यास शिवसेनेचे निष्ठावंत आमदार अंबादास दानवे, कृष्णा पाटील डोणगावकर, ॲड देवयानी डोणगावकर यांच्यासह राष्ट्रावादी दोन आणि काँग्रेस तीन असे एकुण आठ संचालकच महाविकास आघाडीच्या बाजूने आहेत. बँकेतही महाविकास आघाडी अल्पमतात आहे. तर शिंदे गटाचे सात संचालक, भाजपचे चार, एक अपक्ष असे १२ संचालक मंडळ नव्य सरकारच्या बाजूने आहेत. यामुळे जिल्हा बँक सत्तारांच्या माध्यमातून शिंदे गटाच्या ताब्यात राहणार आहे.

जिल्हा बँकेतील पक्षीय बलाबल

• राष्ट्रवादी-२

• काँग्रेस-३

• शिवसेना-१० (सात शिंदे गटाचे)

• भाजप-४

• अपक्ष-१(नितीन पाटीलगटाचे)

• एकूण- २० संचालक