Aurangabad latest News : शहरात तब्बल पावणेचार कोटींचा लखलखाट

औरंगाबाद : जी-२० परिषदेनिमित्त शहरात जय्यत तयारी सुरू आहे. शहरातील रस्ते, चौक, वाहतूक बेटांच्या सुशोभिकरणासह मोठ्या प्रमाणात लायटिंग केले जाणार आहे. त्यासाठी तीन कोटी ३५ लाख रुपये एवढ्या निधीची तरतूद करण्यात आली आहे. हे काम वाराणसी येथील अमर इलेक्ट्रिकलला देण्यात आले आहे.

भारतात होणाऱ्या जी-२० परिषदेच्यानिमित्ताने महिला प्रतिनिधींची औरंगाबादेत बैठक आयोजित केली आहे. परिषदेनिमित्त विविध कामे करण्यासाठी राज्य शासनाने महापालिकेला ५० कोटींचा निधी दिला असून, या निधीतून शहरात सुशोभीकरणाची कामे हाती घेण्यात आली आहेत. उड्डाणपूल, प्रमुख रस्ते, दुभाजक, वाहतूक बेट, ऐतिहासिक वास्तूंची रंगरंगोटी केली जात आहे.

त्यासोबतच लाईटींगही केली जाणार आहे. ही लायटिंग कायमस्वरूपी असेल. या कामासाठी तीन कोटी ७५ लाख रुपयांची तरतूद करण्यात आली आहे. त्यातून विमानतळ ते रामा हॉटेल ते महावीर चौक, महावीर चौक ते दिल्लीगेट, दिल्लीगेट ते हर्सूल टी पॉइंट, हर्सूल टी पाँईट ते जळगाव रोडमार्गे सिडको बसस्थानक अशा प्रमुख मार्गावर रस्ते, दुभाजक, फुटपाथ, रंगरंगोटी, ग्लो-गार्डन, विद्युत रोषणाई केली जाणार आहे.

शेवटच्या टप्प्यात विद्युत रोषणाईची कामे केली जाणार आहेत. त्यात काही लायटिंग कायमस्वरूपी असेल तर काही तात्पुरत्या स्वरूपात केली जाणार आहे. वाराणसी येथील कंत्राटदाराला हे काम देण्यात आले असल्याचे सूत्रांनी सांगितले. या लायटींगमुळे शहराचे रूपच पालटणार आहे.