औरंगाबादेतील ३१ वॉर्ड होणार खुले! दिग्गजांना बसणार फटका

औरंगाबाद : सर्वोच्च न्यायालयाने (Supreme Court Of India) स्थानिक स्‍वराज्य संस्थांमधील ओबीसी (OBC) प्रवर्गाचे राजकीय आरक्षण रद्द (Political Reservation) करण्याचा निर्णय दिल्याने महापालिकेच्या (Aurangabad Municipal Corporation) आगामी निवडणुकीतील वॉर्ड आरक्षणावर परिणाम होणार आहे. ओबीसी प्रवर्गासाठी असलेले ३१ वॉर्ड आता खुल्या प्रवर्गासाठी गृहीत धरले जातील. इतर रचनेत मात्र बदल होणार नाही, असे सूत्रांनी सांगितले. दरम्यान औरंगाबाद महापालिकेच्या निवडणुकीसंदर्भात सर्वोच्च न्यायालयात स्वतंत्र याचिका न्यायप्रविष्ट आहे. राज्यातील औरंगाबादसह नवी मुंबई, वसई विरार व इतर स्थानिक स्वराज्य संस्थांची मुदत एप्रिल २०२० मध्ये संपली आहे. त्यानुसार राज्य निवडणूक आयोगाने वॉर्ड रचना, वॉर्ड आरक्षण जाहीर करण्यासासह निवडणुकीची संपूर्ण तयारी केली होती. पण कोरोना संसर्गामुळे या निवडणुका लांबणीवर पडल्या. (Aurangabad Municipal Corporation's Thirty-One Wards To Be Open For Open Category)

दरम्यान औरंगाबाद महापालिकेच्या निवडणूकीसाठी करण्यात आलेली वॉर्ड रचना आणि वॉर्ड आरक्षणाबाबत आक्षेप घेत माजी नगरसेवक समीर राजूरकर यांनी सर्वोच्च न्यायालयात याचिका दाखल केली आहे. या प्रकरणी जैसे थेचे आदेश सर्वोच्च न्यायालयाने दिले आहेत. असे असतानाच सर्वोच्च न्यायालयाने स्थानिक स्वराज्य संस्थांमधील ओबीसी आरक्षण रद्द करण्यात येत असल्याचा निकाल दिला. या आदेशाचे शहरातील वॉर्ड आरक्षणावर काय परिणाम होणार? याविषयी राजकीय खल सुरू आहे. यासंदर्भात काही जाणकारांनी सांगितले की, ज्या वॉर्डांचे आरक्षण ओबीसी प्रवर्गासाठी निश्चित झाले आहे ते वॉर्ड आता खुले गृहीत धरले जातील.

एससी, एसटीचे वॉर्ड जशास तसे

एससी व एसटी प्रवर्गासाठीचे आरक्षण हे घटनादत्त असल्याने या आरक्षणात कुठलाही बदल होणार नाही. तसेच खुल्या प्रवर्गासाठीच्या वॉर्डांना देखील हात लावला जाणार नाही. ओबीसी प्रवर्गासाठीचे आरक्षण रद्द झाल्याने महिलांसाठीचे १६ व पुरुषणांचे १५ असे ३१ वॉर्ड खुल्या प्रवर्गासाठी होतील, असे सूत्रांनी सांगितले.

आजी-माजी पदाधिकाऱ्यांना फटका

महापालिकेत वर्षानुवर्षे ठाण मांडून असलेल्या अनेक आजी-माजी नगरसेवकांना ओबीसी आरक्षण रद्द झाल्याचा फटका बसण्याची शक्यता व्यक्त केली जात आहे. अनेकांनी आरक्षण सोडत निघाल्यापासून वॉर्डात तयारी करून ठेवली आहे. पण हे वॉर्ड खुल्या प्रवर्गासाठी गृहीत धरल्यास वॉर्डातील चुरस वाढणार आहे.