औरंगाबाद : पीपीई किट घालून जनावरांचे लसीकरण

औरंगाबाद - दुभत्या जनावरांचे ब्रुसेल्ला रोगापासून संरक्षण करण्यासाठी जिल्हा परिषद पशुसंवर्धन विभागातर्फे लसीकरण मोहीम हाती घेतली आहे. प्राण्यांपासून मानवाला ब्रुसेल्ला आजाराची लागण होऊ शकते. त्यामुळे जिल्ह्यात पशुवैद्यकीय डॉक्टर हे पीपीई किट घालून जनावरांना ब्रुसेल्लाची लस देत आहेत. सदरील लस ही ४ ते ८ महिन्यांच्या कालवडींना देण्यात येत आहे.

राष्ट्रीय पशू रोगनियंत्रण कार्यक्रमअंतर्गत लसीकरण मोहीम हाती घेण्यात आली आहे. यापूर्वी केवळ रोगाचे लक्षण असणाऱ्या जनावरांना ही लस दिली जात होती. पण यंदा केंद्र सरकारने राष्ट्रीय अभियान म्हणून या लसीकरण मोहिमेची घोषणा केली. त्यानुसार १ ऑगस्टपासून जिल्हा परिषद पशुसंवर्धन विभागाच्यातर्फे जिल्ह्यात या मोहिमेला सुरवात झाली असून ९१ हजार ८०० ब्रुसेल्लाची लस देण्यात आली आहे.

असा होतो आजार

गाय आणि म्हशीमध्ये गर्भावस्थेच्या सातव्या महिन्यांत गर्भपात होतो. तसेच गर्भपातानंतर आत मांस वाढून ते कुजण्यास सुरवात होते. यात जनावराचा मृत्यू होतो. त्यामुळे शेतकऱ्यांना मोठे आर्थिक नुकसान सोसावे लागते.

६ लाख जनावरांना डिजिटल नंबर

जिल्ह्यात ६ लाख ५० हजार जनावरे असून यात १ लाख ६९ हजार दुभती जनावरे आहेत. जिल्ह्यातील ६ लाख ३० हजार जनावरांना १२ क्रमांक असलेले युनिक आयडेंटिफिकेशन डिजिटल नंबर देण्यात आले आहेत. जनावरांच्या कानावर या नंबरची नोंद असून नव्याने लस दिलेल्या वासरांना देखील हे नंबर दिले जात आहेत.

कच्चे दुधातून मानवाला रोगाची शक्यता

गाय आणि म्हशींमध्ये बॅक्टेरिया आणि इतर सूक्ष्मजीवांमुळे हा रोग होतो. पाणी आणि अन्नाच्या माध्यमातून जनावरांमध्ये हा रोग पसरतो. गाय आणि म्हशीमध्ये गर्भ पिशवी संबंधित हा आजार आहे. रोगग्रस्त दुभत्या जनावराचे कच्चे दूध प्राशन केल्यास तसेच संपर्कात आल्यास हा रोग माणसाला देखील होऊ शकतो.

मानवाला आजार झाल्यास त्याची लक्षणे

• गुडघे व सांधे दुखणे.

• वारंवार ताप येणे.

• वजन कमी होणे.

• थकवा येणे.

सर्व पशुवैद्यकीय दवाखान्यात ही लस उपलब्ध करून दिली आहे, पशुपालकांनी आपल्या जनावरांचे लसीकरण करून घ्यावे. तसेच लसीकरणासाठी आलेल्या पशुवैद्यकीय डॉक्टरांना सहकार्य करावे.

-डॉ. सुरेखा माने, जिल्हा पशुसंवर्धन अधिकारी.