Dharashiv News : तुळजापूरात भाजपच्या प्रदेशाध्यक्षांना मराठा क्रांती ठोक मोर्चाच्या वतीने दाखविले काळे झेंडे

तुळजापूर : भारतीय जनता पक्षाचे प्रदेशाध्यक्ष चंद्रकांत बावनकुळे यांना बुधवारी ता.6 मराठा क्रांती ठोक मोर्चाच्या कार्यकत्यांनी काळे झेंडे दाखविले. भाजपचे प्रदेशाध्यक्ष श्री बावनकुळे हे तुळजाभवानी मातेच्या दश॔नासाठी जात होते यावेळी सदरचा प्रकार घडला. भवानी रस्त्यावर मराठा क्रांती ठोक मोर्चाचे निवडक कार्यकर्ते आले.

त्यांनी श्री बावनकुळे यांना काळे झेंडे दाखविण्यास सुरूवात केली. तसेच निषेध व्यक्त केला, एक मराठा लाख मराठा , आरक्षण आमच्या हक्काचे , मराठा समाजास 50 % च्या आतमध्ये समाविष्ट करून मराठ्यांना आरक्षण मिळालेच पाहिजे म्हणून मोठी घोषणाबाजी करण्यात आली.

मराठा क्रांती ठोक मोर्चाच्या कार्यकत्यांनी गनिमी काव्याने निद॔शने केल्यामुळे पोलीस प्रशासनाची हि ऐनवेळी पळापळी झाली. सर्व आंदोलकांना ताब्यात घेऊन श्री बावनकुळे मार्गस्थ झाल्यानंतर आंदोलकांना सोडून देण्यात आले.

यावेळी मराठा क्रांती ठोक मोर्चाचे महेश गवळी, अजय साळुंके , अर्जुन साळुंके, कुमार टोले, सुदर्शन वाघमारे, विकास वाघमारे, वैजनाथ सुरवसे, उमेश जाधव, सत्यजीत साठे आदी उपस्थित होते.