Sambhaji Nagar News : खैरे-दानवेंचे मनोमिलन?

छत्रपती संभाजीनगर : शिवसेनेत माजी खासदार तथा शिवसेना नेते चंद्रकांत खैरे आणि विधान परिषदेचे विरोधी पक्षनेते अंबादास दानवे यांच्यातील गटबाजी जगजाहीर आहे. मात्र, काही दिवसांपासून लोकसभा निवडणुकीच्या पार्श्‍वभूमीवर चंद्रकांत खैरे हे दानवे यांच्याशी जुळवून घेण्याचा प्रयत्न करत आहेत. शुक्रवारी याचा प्रत्यय आला.

अंबादास दानवे यांनी लोकसभा निवडणुकीसाठी तयार केलेल्या व्हॅनिटी व्हॅनचे उद्‍घाटन खैरे यांच्या हस्ते करून हात पुढे केल्याचे चित्र पहायला मिळाले. विशेष म्हणजे हा कार्यक्रम खेळीमेळीत झाला. त्यामुळे खरेच दोघांमध्ये मनोमिलन झाले का? असा प्रश्‍न पदाधिकाऱ्यांना पडला आहे.

दरम्यान, लोकसभा निवडणुकीच्या प्रचारासाठी अंबादास दानवे यांनी व्हॅनिटी व्हॅन तयार केली आहे. लोकसभेची निवडणूक आगामी फेब्रुवारीत जाहीर होण्याची शक्यता आहे. त्यानुसार प्रत्येक राजकीय पक्षातर्फे हालचाली सुरू झाल्या आहेत. त्यात शिवसेना (उबाठा) पक्षातर्फे देखील बैठकांचे सत्र सुरू आहे.

त्याअनुषंगाने आता व्हॅनिटी व्हॅन तयार करण्यात आली आहे. यासंदर्भात अंबादास दानवे यांनी सांगितले, की अनेकवेळा ग्रामीण भागात आवश्यक प्राथमिक सोयीसुविधा उपलब्ध नसतात. त्यामुळे निवडणुकीच्या धावपळीत पक्षाच्या पदाधिकाऱ्यांना त्रास होऊ नये, यासाठी ही व्हॅन तयार करण्यात आली आहे. विनायक पांडे, शहरप्रमुख विश्वनाथ स्वामी, विजय वाघचौरे, तालुका प्रमुख आनंद पाटील, नितीन पवार, हरिभाऊ हिवाळे, गणेश लोखंडे, प्रमोद ठेंगडे, अनिल लहाने, चंद्रकांत इंगळे, सुगंधकुमार गडवे, शिवा लुंगारे उपस्थित होते.