Chh. Sambhaji Nagar : कोंडी,कसरत अन् सुटका! रेल्वेगेट बंद झाल्याच्या पहिल्याच दिवशीची परिस्थिती

छत्रपती संभाजीनगर - शिवाजीनगर भुयारी मार्गाच्या कामासाठी रेल्वे गेट वर्षभर बंद करण्याचा निर्णय घेण्यात आला. त्याच्या पहिल्याच दिवशी रविवारी (ता. १५) संग्रामनगर उड्डाणपुलावर मोठ्या प्रमाणावर वाहतुकीची कोंडी झाली. उड्डाणपुलावर वाहनधारकांची गर्दी वाढल्याने लांबच लांब वाहनांच्या रांगा लागल्या. ६२० मीटर लांबीचा हा पूल ओलांडण्यासाठी एका वाहनास २० ते ३० मिनिटांचा वेळ लागला. दुसरीकडे बंद गेटच्या खालून वाहने काढण्यासाठी वाहनधारकांची धोकादायक धडपड सुरूच होती.

अनेक वर्षांपासून प्रतीक्षेत असलेल्या शिवाजीनगर रेल्वे भुयारी मार्गाच्या कामाला सुरुवात होत आहे. या कामाचे भूमिपूजन रविवारी करण्यात आले. त्यामुळे आता शिवाजीनगर रेल्वेगेट वर्षभरासाठी बंद करण्यात आले आहे. दुपारी दोननंतर गेट बंद केल्यानंतरही या मार्गावरून दुचाकीस्वार गेटच्या खालून धोकादायक पद्धतीने वाहने काढण्याचा प्रयत्न करीत होते. गेट खालून, रेल्वे पटरीवरून जिथे जागा मिळेल तेथून वाहने, सायकल नेण्याचा प्रयत्न काहींनी केला. ही कसरत करत असताना अनेक जणांना दुखापती झाल्या.

वाहनांचे नुकसान झाल्याचे बघावयास मिळाले. दरम्यान, वाहनधारकांना पर्यायी सर्वात महत्त्वाचा मार्ग म्हणजे संग्रामनगर उड्डाण पुलाचा मार्ग आहे. या पुलावर वाहनांची प्रचंड संख्या वाढल्याने दिवसभर वाहतुकीची कोंडी होती. एका वाहनाला पूल ओलांडण्यासाठी तब्बल २० ते ३० मिनिटांचा वेळ लागला. सायंकाळी उशिरापर्यंत वाहतूक कोंडीची समस्या कायम होती. यामुळे वाहनधारकांना मनस्ताप सहन करावा लागला.

दुप्पटीने वाढली वाहनांची ये-जा

या उड्डाणपुलावरून आतापर्यंत रोज साधारण १२ ते १५ हजार वाहनांची ये- जा होत होती. दरम्यान, शिवाजीनगर रेल्वे गेट वर्षभरासाठी बंद केल्याने आता संग्रामनगर उड्डाण पुलावर वाहनांची संख्या दुप्पट झाली आहे. त्यामुळे वाहतूक कोंडी होत आहे.

संग्रामनगर उड्डाणपुलावर वाहनधारकांच्या रांगाच रांगा

केवळ ६२० मीटर अंतर पार करायला लागला अर्धा तास

रेल्वेगेट बंद झाल्याच्या पहिल्याच दिवशीची परिस्थिती

असा आहे पूल पुलाची लांबी ६२० मीटर दर्ग्याच्या बाजूला २० मीटरचे ११ गर्डर बीड बायपासच्या बाजूला २० मीटरचे ७ गर्डर नियमित वाहतूक १२ ते १५ हजार वाहने (अंदाजित) उद्‍घाटन २८ जानेवारी २०१४