Chh. Sambhajinagar Crime : लग्नासाठी अल्पवयीन मुलीला पळविण्यात मुलाला मदत करणाऱ्या पित्याला अटक

छत्रपती संभाजीनगर : लग्नासाठी अल्पवयीन मुलीला पळविण्यात मुलाला मदत करणाऱ्या आरोपी पित्याला एमआयडीसी वाळूज पोलिसांनी पुण्यातून मंगळवारी (ता.१) सकाळी बेड्या ठोकल्या. अशोक शामराव माळगावे (५०, रा. खराबवाडी सोसायटी, पुणे) असे त्या आरोपीचे नाव आहे. तर गुन्ह्यातील आरोपीचा मुलगा श्रेयस अशोक माळगावे (२६) हा पसार आहे.

प्रकरणात १७ वर्षीय पीडितेच्या आईने फिर्याद दिली. त्यानुसार, २८ जुलैरोजी फिर्यादीच्या पीडित मुलीला श्रेयस माळगावे याने लग्न करण्यासाठी पळवून नेल्याची तक्रार फिर्यादीने दिली होती. त्यानुसार, एमआयडीसी वाळूज पोलीस ठाण्यात गुन्हा दाखल करण्यात आला होता.

पोलिसांचा खाक्या अन् दिली कबुली

पोलिसांनी अशोकची चौकशी केली असता, पीडिता ही आरोपी अशोककडे आली होती. तिने श्रेयससोबत प्रेम करत असल्याचे सांगत, दोघे लग्न करणार असल्याचे सांगितले अशी माहिती आरोपी अशोक याने पोलिसांना दिली. मात्र, पोलिसांनी त्यावर विश्वास न ठेवता त्याला खाक्या दाखवला.

त्यावेळी आरोपी हा एक दीड महिन्यांपासून श्रेयस आणि पीडिता यांना लग्नासाठी व पीडिता पळवून नेण्यासाठी मदत करीत असल्याचे स्पष्ट झाले. आरोपीला अटक करुन न्यायालयात हजर करण्यात आले असता, आरोपी पित्याला पाच ऑगष्टपर्यंत पोलिस कोठडी ठेवण्याचे आदेश जिल्हा व सत्र न्यायाधीश ए. एस. वैरागडे यांनी दिले.

ढाबाचालकाने पकडून ठेवले पित्याला

प्रकरणाचा तपास सुरु असतांना आरोपी श्रेयसने पीडितेला पुणे येथे पळवून नेले असून ते दोघे तेथून कर्नाटकला जाणार असल्याची माहिती पोलिसांना मिळाली.

त्यानुसार पोलिसांचे एक पथक पुण्याला गेले, तेथे चौकशी केली असता, पीडिता ही एका मुलासह नॅशनल ढाबा (चौफुला, यवत ता. दौंड जि. पुणे) येथे असल्याची माहिती पोलिसांना मिळाली. पोलिसांनी ढाबा मालकाला फोन करुन त्यांना थांबवून ठेवण्याचे सांगितले. ढाबामालकाने पीडितेसह तिच्यासोबत असलेल्या श्रेयस व त्याचे वडील अशोक या दोघांना थांबविण्याचा प्रयत्न केला, मात्र पीडिता व श्रेयस पसार होण्यात यशस्वी झाले, तर ढाबा मालकाने अशोकला पकडून पोलिसांच्या स्वाधीन केले.