स्वच्छ हवा उपक्रमात महापालिकेची ‘हवा’,राज्यात दुसरा तर देशात पटकावले १२ वे स्थान

शहराचे वाढते प्रदूषण कमी करण्यासाठी कोट्यवधी रुपये खर्च करून विविध उपक्रम राबविण्यात आल्यामुळे छत्रपती संभाजीनगर महापालिकेचा राष्ट्रीय स्वच्छ हवा कार्यक्रमात राज्यात दुसरा नंबर आला आहे. त्यासोबत महापालिकेने राष्ट्रीय स्तरावर १२ वे स्थान पटकावले आहे.

शहरांचे वाढते प्रदूषण डोकेदुखी ठरत आहे. त्यामुळे केंद्र शासनाने ‘राष्ट्रीय स्वच्छ हवा’ उपक्रम सुरू केला असून, त्याअंतर्गत महापालिकांना कोट्यवधी रुपयांचा निधी दिला जात आहे. या निधीतून शहरात महापालिकेने विविध उपक्रम हाती घेतले आहेत. प्रशासक जी. श्रीकांत यांच्या सूचनेनुसार वाहतूक बेट विकसित करून त्यात कारंजे लावणे, जुन्या कारंज्यांची दुरुस्ती करणे, व्हर्टिकल गार्डन उभारणे, ज्या रस्त्यावर दुभाजक नाहीत, तिथे दुभाजक बांधणे, खुल्या जागा, दुभाजकांमध्ये दाट वृक्षारोपण करणे, शहरातील विविध भागात पडलेले बांधकाम साहित्य उचलणे, फुटपाथ तयार करणे, स्विपिंग मशीनद्वारे रस्त्यावरील धूळ कमी करणे, अशी कामे शहरात करण्यात आली आहेत.

महापालिकांनी केलेल्या कामाचा आढावा घेऊन व शहरातील हवेची गुणवत्ता तपासून दरवर्षी क्रमवारी जाहीर केली जाते. त्यात हवा देशातील १२६ शहरांमधून छत्रपती संभाजीनगर महापालिकेने १२ वा क्रमांक पटकावला तर राज्यात दुसरा क्रमांक मिळवला. राष्ट्रीय स्वच्छ हवा कार्यक्रम अंतर्गत प्राण पोर्टलच्या त्रैमासिक अहवालात राज्यातील ठाणे शहर प्रथम तर छत्रपती संभाजीनगर द्वितीय क्रमांकावर असल्याचे नमूद करण्यात आले आहे. या यादीत छत्रपती संभाजीनगरनंतर राज्यातील नवी मुंबई व नागपूर शहरांचा क्रमांक आहे.

दंडात्मक कारवाईमुळे लागली शिस्त

शहरातील अनेक भागात नव्या इमारतींचे कामे सुरू आहेत. जुन्या इमारती पाडताना मोठ्या प्रमाणात धूळ पसरते. त्यामुळे जुने बांधकाम पाडताना व नवे बांधकाम करताना आवेष्टन करणे बंधनकारक करण्यात आले आहे. नियम न पाळणाऱ्यांकडून दंड वसूल केला जात आहे. उपायुक्त रवींद्र जोगदंड, उद्यान अधीक्षक विजय पाटील व स्वच्छ हवा कार्यक्रमासाठी सल्लागार गीतांजली कौशिक यांच्या पुढाकाराने ‘राष्ट्रीय स्वच्छ हवा’ उपक्रमातील कामे सुरू आहेत.