वक्फची जमीन हडपणाऱ्यांवर गुन्हे; बोर्डाच्या बैठकीतील निर्णय

औरंगाबाद: ठाणे व जालना रस्ता येथील वक्फ बोर्डाच्या जमिनीवर इमारत बांधून त्या विक्री करण्यात आल्या. या दोन्ही प्रकरणांत संबंधित मुतवल्लीसह जमीन विक्री करणाऱ्यांवर गुन्हे नोंद करावे. तसेच राज्यात कोणत्याही जागेवर वक्फ बोर्डाच्या जमिनीवर अतिक्रमण होत असेल तर वक्फ बोर्डाच्या अधिकाऱ्यांनी ‘सुमोटो’ घेऊन संबंधित जमीन लाटणाऱ्यांवर गुन्हे नोंदवावेत. असे आदेश वक्फ बोर्डाच्या बैठकीत शुक्रवारी (ता.२५) वक्फ अधिकाऱ्यांना देण्यात आले आहेत.
वक्फ बोर्डाची बैठक शुक्रवारी खासदार फौजिया खान यांच्या अध्यक्षतेखाली घेण्यात आली.

या बैठकीत झालेल्या निर्णयाबाबत बैठकीच्या प्रभारी अध्यक्ष फौजिया खान यांनी दिली. त्यांनी सांगितले की, वक्फ बोर्डाला मॉडेल बोर्ड तयार करण्याचा निर्णय घेण्यात आला. यात बोर्ड डिजिटायजेशन करण्यात येईल. तसेच कर्मचारी भरतीबाबतही शासनाकडे पाठपुरावा केला जाईल. बैठकीत खासदार इम्तियाज जलील, आमदार वजाहत खान, वक्फ बोर्डाचे सदस्य एम. एम. शेख, मुद्दस्सीर लांबे, अॅड. ए. यू. पठाण यांच्यासह अन्य सदस्यांची उपस्थिती होती.

कारणे दाखवा नोटीस बजावणार
महापालिकेने आमखास मैदानाजवळील वक्फ बोडाची जागा परस्पर स्मार्ट सिटीला दिली. या प्रकरणाबाबत बोर्डात चर्चा करण्यात आली. वक्फ ट्रिब्युनलचा निर्णय वक्फ बोर्डाच्या बाजूने असतानाही महापालिकेने दाद दिली नाही. या प्रकरणात वक्फ बोर्डाच्या लिगल टीमला सदर प्रकरणात लक्ष घालण्याचे आदेश देण्यात आले असून ज्या वकिलांनी या प्रकरणात काम केले नाही. अशा वकिलांना कारणे दाखवा नोटीस बजाविण्याचा निर्णय बैठकीत घेण्यात आला.