Cabinet Meeting : मराठवाड्यातील मंत्रिमंडळ बैठकीपूर्वी फडणवीसांचा विरोधकांवर हल्लाबोल; म्हणाले इतके वर्ष माशा...

Marathwada Cabinet meeting : छत्रपती संभाजीनगर येथे आज राज्य मंत्रिमंडळाची महत्वपूर्ण बैठक पार पडणार आहे. या बैठकीत राज्य सरकाकडून काही मोठे निर्णय घेतले जाण्याची शक्यता आहे. यादरम्यान या बैठकीसाठी राज्याचे उपमुख्यमंत्री देवेंद्र फडणवीस हे देखील दाखल झाले आहेत. दरम्यान छत्रपती संभाजीनगर येथे पोहचलेल्या फडणवीस यांनी विरोधकांवर जोरदार हल्लाबोल केला आहे.

मागच्यावेळी मंत्रिमंडळाची जी बैठक संभाजीनगरमध्ये झाली होती त्या बैठकीत घेतलेल्या जवळपास सर्व निर्णयाची अंमलबजावणी झाली आहे. एखाद-दुसरा शेवटच्या टप्प्यात आहे, कारण त्यात काही अडचणी आहेत. याची माहिती आम्ही माध्यमांना देणार आहोत. जे लोकं मागच्या बैठकीत काय झालं? असं विचारत आहेत त्यांनी ते वाचून घ्यावं.

माझा त्यांना सवाल आहे, अडीच वर्षांमध्ये मराठवाड्यासाठी तुम्ही काय केलं? तुम्ही सरकारमध्ये होते, एखादा निर्णय मागे राहिला असेल तर तो पूर्ण करण्याची जबाबदारी तुमची होती. तुम्ही अडीच वर्षे माशा मारत होतात का? असा सवाल फडणवीस यांनी केला.

मराठवाडा वॉटर ग्रीडचा मुडदा पाडण्याचं काम ज्या सरकारने केलं आता तेच लोकं मराठवाड्याला काय मिळालं असं विचारतात. यांना मराठवाड्याशी देणं घेणं नाहीये. यांना केवळ राजकारण करायचं आहे, असेही उपमुख्यमंत्री देवेंद्र फडणवीस म्हणाले.

मराठवाड्यामध्ये आज मंत्रिमंडळाची बैठक बैठक होत असून या बैठकीवरून विरोधकांनी सरकारवर टीका केली आहे. मराठवाड्यामध्ये तब्बल सात वर्षांनी होत असलेल्या राज्य मंत्रिमंडळाच्या बैठकीकडे अवघ्या राज्याचे लक्ष लागले आहे. आता मराठवाड्याला थेट निधी मिळणार की पुन्हा नुसताच घोषणांचा पाऊस पडणार, असा सवाल यानिमित्ताने उपस्थित केला जात आहे.

सात वर्षांपूर्वी झालेल्या मंत्रिमंडळाच्या बैठकीतील घोषणांची पूर्तता आधी करावी. तत्कालीन मुख्यमंत्री देवेंद्र फडणवीस यांनी २०१६ मध्ये मराठवाडा विकासाचा ४९ हजार कोटींचा कालबद्ध कार्यक्रम जाहीर केला होता, त्यापैकी १-२ टक्केच कामे झाली आहेत असे विधान परिषदेचे विरोधी पक्षनेते अंबादास दानवे म्हणाले होते.