Chatrapati Sambhajinagar News : अजिंठा वेरूळ चित्रपट महोत्सवाच्या मानद अध्यक्षपदी दिग्दर्शक आशुतोष गोवारीकर

- पृथा वीर

छत्रपती संभाजीनगर - दिग्दर्शक व निर्माते आशुतोष गोवारीकर यांची दहाव्या अजिंठा वेरूळ आंतरराष्ट्रीय चित्रपट महोत्सवाच्या मानद अध्यक्षपदी नियुक्ती करण्यात आली आहे. ऑस्कर नामांकित लगानसह, स्वदेस, जोधा अकबर, पानिपत यांसारख्या चित्रपटांचे दिग्दर्शक गोवारीकर यांनी आपला अभिनय, दिग्दर्शन व चित्रपट निर्मितीद्वारे भारतीय सिनेजगतात मागील तीन दशकांहून अधिक काळापासून उल्लेखनीय योगदान दिले आहे. 'अजिंठा वेरूळ आंतरराष्ट्रीय चित्रपट महोत्सवाच्या मानद अध्यक्षपदाची जबाबदारी मी माझ्यासाठी एक बहुमान समजतो,' अशी प्रतिक्रिया आशुतोष गोवारीकर यांनी दिली.

महोत्सवाच्या नव्या संयोजन समितीची घोषणा महोत्सवाचे संस्थापक अध्यक्ष नंदकिशोर कागलीवाल व प्रमुख मार्गदर्शक अंकुशराव कदम यांनी ही माहिती दिली.

अजिंठा वेरूळ आंतरराष्ट्रीय चित्रपट महोत्सव नाथ ग्रुप, महात्मा गांधी मिशन व यशवंतराव चव्हाण सेंटर जिल्हा केंद्र छत्रपती संभाजीनगर प्रस्तुत व मराठवाडा आर्ट कल्चर व फिल्म फाउंडेशन व केंद्र सरकारच्या सुचना व प्रसारण मंत्रालय, एनएफडीसी व महाराष्ट्र शासनाच्या विशेष सहकार्याने संपन्न होतो. महोत्सवाचे दहावे वर्ष असून छत्रपती संभाजीनगर येथे १५ ते १९ जानेवारी २०२५ दरम्यान महोत्सवाचे आयोजन करण्यात आले आहे.

महोत्सवाच्या मानद अध्यक्षपदी आशुतोष गोवारीकर व महोत्सव संचालकपदी (फेस्टिवल डायरेक्टर) प्रसिध्द चित्रपट दिग्दर्शक सुनिल सुकथनकर यांची नियुक्ती करण्यात आलीआहे. भारतीय सिनेमाला थेट ऑस्करपर्यंत पोचविणारे आशुतोष गोवारीकर यांचा जगभरातील सर्वच महत्वाच्या चित्रपट महोत्सवामध्ये विशेष सहभाग राहिलेला आहे.

तसेच 'अकॅडमी ऑफ मोशन पिक्चर आर्टस् अ‍ॅण्ड सायन्स' यांच्या वतीने दिल्या जाणाऱ्या ऑस्कर पुरस्कारांकरता मतदान सदस्य म्हणून देखील ते कार्यरत आहेत. गोवारीकरांच्या विशेष मार्गदर्शनाखाली महोत्सवाच्या दशकपूर्तीची व्यापक वाटचाल आगामी काळात अतिशय महत्वपूर्ण ठरणार आहे, असे आयोजक म्हणाले.

आयोजन समितीच्या या नवनियुक्त पदाधिकाऱ्यांचे नाट्य चित्रपट दिग्दर्शक व महोत्सवाचे कार्यकारी संचालक चंद्रकांत कुलकर्णी, नीलेश राऊत, जयप्रद देसाई, ज्ञानेश झोटींग, शिव कदम, दीपिका सुशीलन यांच्यासह सर्व संयोजन समितीने केले आहे.

माझा बहुमान - गोवारीकर यांची प्रतिक्रिया

'अजिंठा वेरूळ आंतरराष्ट्रीय चित्रपट महोत्सवाच्या मानद अध्यक्षपदाची जबाबदारी मी माझ्यासाठी एक बहुमान समजतो. ज्येष्ठ दिग्दर्शक चंद्रकांत कुलकर्णी, फेस्टिवल डायरेक्टर सुनिल सुकथनकर, जयप्रद देसाई, ज्ञानेश झोटिंग या सर्व सृजनशील दिग्दर्शकांच्या जोडीने एक अत्यंत चांगली कलात्मक प्रक्रिया यानिमित्ताने घडवता येईल, याचा मला विशेष आनंद आहे.

उल्लेखनीय बाब म्हणजे ऐतिहासिक आणि सांस्कृतिक लौकिक असलेल्या छत्रपती संभाजीनगर येथे या महोत्सवाचे आयोजन करण्यात येते. हा संपूर्ण परिसर उर्जेने भारलेला आहे. अशा ठिकाणी दर्जेदार जागतिक चित्रपट रसिकांसमोर आणल्याने नव्या प्रतिभेला संधी मिळेल. नव्या प्रतिभा जगासमोर आणता येईल. अजिंठा वेरूळ आंतरराष्ट्रीय चित्रपट महोत्सवाच्या माध्यमातून मला योगदान देता येईल याचा मला विशेष आनंद आहे', असे आशुतोष गोवारीकर म्हणाले.

सुनील सुकथनकर यांनी स्वीकारला पदभार -

दहाव्या अजिंठा वेरूळ आंतरराष्ट्रीय चित्रपट महोत्सवाच्या संचालकपदी (फेस्टिव्हल डायरेक्टर) राष्ट्रीय पुरस्कार विजेते प्रसिध्द चित्रपट दिग्दर्शक सुनील सुकथनकर यांनी नुकताच पदभार स्विकारला. माजी संचालक अशोक राणे यांचा कार्यकाळ नुकताच पूर्ण झाल्याने सुनील सुकथनकर यांची निवड झाली.

सुकथनकर यांनी तीन दशकांपासून मराठी सिनेसृष्टीस उल्लेखनीय योगदान दिले आहे. दिवंगत दिग्दर्शिका सुमित्रा भावे यांच्यासोबत त्यांनी दिग्दर्शित केलेल्या अनेक सिनेमांना राष्ट्रीय पुरस्कार मिळालेले आहे. देशभरातील अनेक चित्रपट महोत्सवांमध्ये सुकथनकर यांनी ज्युरी अध्यक्ष व ज्युरी सदस्य या नात्याने काम केले आहे.