Chhatrapati Sambhajinagar Crime : उद्यानात नशा करण्यास विरोध केल्याने टोळक्याने घरात घुसून वॉचमनला भोसकले

छत्रपती संभाजीनगर : शास्त्रीनगरातील मनपा उद्यानात नशा करण्यास मज्जाव केल्यामुळे नशेखोरांच्या टोळक्याने सुरक्षारक्षकावर घरात घुसून चाकूहल्ला केला. त्यांच्यावर छाती आणि पोटात चार गंभीर वार करण्यात आले. सुरक्षारक्षकाची प्रकृती चिंताजनक असून, त्यांना उपचारासाठी खासगी रुग्णालयात दाखल केले आहे. ही घटना रविवारी (ता. ७) संध्याकाळी साडेसात वाजता घडली.

उत्तम रूपा चव्हाण (४५, रा. शास्त्रीनगर उद्यान) असे जखमी सुरक्षारक्षकाचे नाव आहे. ते उद्यानातच एका खोलीत कुटुंबासह राहतात. शास्त्रीनगरात मनपाचे उद्यान आहे. तेथे शास्त्रीनगर को ऑप हाउसिंग सोसायटीतील अनेक कुटुंबे फिरण्यासाठी उद्यानात येतात.

दरम्यान, अंधार झाल्यावर काही टवाळखोर, नशेबाज तरुणांचे टोळकेही येथे नेहमी येत असते. रविवारी चार ते पाच नशाखोर उद्यानात नशा करीत बसले होते. सुरक्षारक्षक चव्हाण यांनी त्यांना हटकले. उद्यानात नशा करण्यास मज्जाव करून त्यांना तेथून हाकलून दिले.

काही वेळाने त्यातील दोन नशाखोर चाकूसह परत उद्यानाकडे आले. तेव्हा चव्हाण हे त्यांच्या खोलीत होते. नशाखोरांनी चव्हाण यांच्या पत्नीसमोर घरात घुसून त्यांच्यावर चाकूहल्ला केला. दोन्ही आरोपींनी मिळून चार वार केले.

एक वार छातीजवळ लागला आहे. त्यामुळे चव्हाण हे रक्तबंबाळ होऊन जागीच कोसळले. त्यानंतर दोन्ही आरोपी उद्यानाच्या मागील बाजूने भिंतीवरून उडी मारून पसार झाले. आरडाओरड झाल्यावर स्थानिकांनी जखमी उत्तम चव्हाण यांना जवळच्या खासगी रुग्णालयात दाखल केले. तेथून त्यांना दुसऱ्या ठिकाणी हलविण्यात आले आहे.