Gold Rate : ऐन लग्नसराईत सोन्याची उच्चांकी दरवाढ ; सात हजार रुपये प्रतिग्रॅम,वधू पित्याची होतेय दमछाक

माजलगाव : दिवसेंदिवस वाढत असलेल्या महागाईमुळे सर्वसामान्यांचे कंबरडे मोडले आहे. त्यातच भर म्हणून आता ऐन लग्नसराईत सोन्याच्या दरामध्ये उच्चांकी दरवाढ झाली आहे. सोन्याने सात हजार रुपये प्रतिग्रॅम दर पार केला असून, या लग्नसराईमध्ये वधूपित्यांची दमछाक होताना दिसत आहे.

लग्न असो किंवा कुठलेही फंक्शन असो या ठिकाणी सोन्याला फार महत्त्व आहे. महिला वर्गास सर्वाधिक प्रिय म्हणून देखिल सोन्याकडे पाहिले जाते. तर, लग्नामध्ये वधू- वर यांना सोन्याचे दागिने दिले जातात. परंतु, मागील दोन महिन्यांत पाहिले तर सोन्याची सर्वाधिक भाववाढ झाली आहे. सध्या सोने सात हजार रुपये प्रतिग्रॅम झाले असल्याने सर्वसामान्यांसह वधू पित्याची सोने खरेदी करताना दमछाक होत आहे.

त्यामुळे सोने दरवाढीचा मोठा परिणाम होत आहे. दरम्यान, सर्व क्षेत्रात होणारी दरवाढ ही सुरूच आहे. परंतु, शेतकऱ्यांच्या शेतीमालाची मात्र दरवाढ होणे थांबले आहे. तालुक्यातील अनेक शेतकऱ्यांच्या घरात आजही सोयाबीनसह कापूस तसाच पडून आहे.

टेम्पल ज्वेलरीला महत्त्व

दिवसेंदिवस सोन्याच्या दरामध्ये वाढ होत असली तरी देखिल आजच्या या डिजिटल युगामध्ये नवं- नविन दागिन्यांना अनन्यसाधारण असे महत्त्व आहे. जुन्या काळामध्ये टेम्पल ज्वेलरीला एक वेगळे महत्त्व होते. आज देखिल या टेम्पल ज्वेलरीची भुरळ तरूणींसह महिला वर्गामध्ये आहे. सराफा दुकानात या लग्नसराईत टेम्पल ज्वेलरीला मोठी मागणी आहे.

पारंपारिक दागिन्यांसह टेम्पल ज्वेलरी आणि नविन डिझाईन विक्रीसाठी तयार आहेत. परंतु, सोन्याच्या दरांमध्ये होत असलेल्या दरवाढींमुळे ग्राहक मात्र जेमतेमच सोन्या- चांदीचे दागिने खरेदी करत आहे. ऐन लग्नसराईत दरवाढ झाल्याने सराफा बाजारात मात्र ग्राहक अत्यल्प प्रमाणात आहे.

- चंद्रकांत देशमुख, सराफा व्यावसायिक

यावर्षी झालेल्या अत्यल्प पावसामुळे कापसाचे उत्पादन अत्यंत कमी प्रमाणात झाले. त्यातच या महिन्यामध्ये मुलीचा विवाह सोहळा आहे. सोन्याच्या दरात वाढ होत असल्याने मनी मंगळसूत्र व मोजकेच दागिने खरेदी करण्याची वेळ आली आहे.

- रोहिदास पवार, वधुपिता