दुर्दैवी! आई, आजी, मावशीनंतर पत्नीलाही कोरोनाने हिरावले

लासूर स्टेशन (औरंगाबाद): कोरोनाचा आघात एखाद्या कुटुंबावर किती दुर्दैवी ठरू शकतो आणि या मृत्यू तांडवानंतर उर्वरित कुटुंबियांवर हा तडाखा सहन करण्याशिवाय कसलाही पर्याय नसतो तेव्हा हतबलतेने हे धक्के सहन करावे लागतात.अगदी अशीच स्थिती ओढवली आहे लासूर स्टेशन ग्रुप ग्रामपंचायतीतील सावंगी (ता.गंगापूर) गावच्या संदीप जगताप यांच्यावर. जगताप कुटुंब या ओढवलेल्या परिस्थितीत धीरोदात्तपणे मनस्थिती सांभाळून संकटाला सामोरे जात आहे. लासूर स्टेशनला बाजार समितीअंतर्गत आडत दुकानांवर मुनीम असलेल्या संदीपच्या कुटुंबात आता वडील, भाऊ, भावजय, दोन मुले आहेत. संदीपच्या आई, आजी, मावशी आणि आता परवा मंगळवारी (ता.15) पत्नी सुनीता संदीप जगताप हिचा कोरोनाने मृत्यू झाला. दोन महिन्यांत कोरोनाने संदीपच्या कुटुंबातील चार महिला मृत पावल्या.

एप्रिलमध्ये अवघ्या आठ दिवसाच्या अंतरात आई, आजी, मावशी या तीन महिला कोरोनाचा संसर्ग होऊन मरण पावल्या. आता दोन महिन्यांपासून कोरोनाशी झुंज देत असलेल्या संदीपची पत्नी सुनीताचाही बळी कोरोनाने घेतला. सहा वर्षांचा एक मुलगा आणि दोन वर्षांची मुलगी असलेल्या या दोन लेकरांच्या आईला अखेर कोरोनामुळे जीव गमवावा लागला. अगोदर एप्रिल महिन्यात पद्माबाई पुंडलीक जगताप (आई, वय 55), सुभद्राबाई बारकु कळमकर (आजी, वय 74), कमलबाई पोपटराव ढंगारे (मावशी,वय 50) व आता दोन महिन्यानंतर जून मध्ये सुनीता जगताप (पत्नी, वय 28) या अशा चार महिलांना कोरोनाने गिळंकृत केल्याने हतबल संदीपवर दुःखाचा डोंगर कोसळला आहे.

घरातील दोन महिला आई, आजी कोरोनाने मृत्यू पावल्यानंतर पत्नी सुनीताही कोरोनाशी झुंजत होती. घरात कोणी मोठी महिला नसल्याने मुलांचा सांभाळ करण्यासाठी आलेल्या धोंदलगावच्या मावशीचाही मृत्यू झाला. आता संदीपच्या घरात सहा वर्षाचा मुलगा, दोन वर्षाची मुलगी, वडील पुंडलीकराव जगताप, भाऊ अनिल व भावजई कांचन जगताप असा परिवार आहे. कोरोनाने या कुटुंबातील चार महिला हिरावून नेल्यानंतर आता जगताप कुटुंब धीराने, संयमाने या विदारक परिस्थितीला सामोरे जाण्याची मनस्थितीत आहे. कोरोनाने एकाच कुटुंबातील चार महिलांचा बळी घेतल्याने ग्रामस्थ हादरले. या कुटुंबाबद्दल मोठी सहानुभूती असल्याचे चित्र बाजारपेठेत असून ग्रामस्थ हळहळले आहेत.