कोरोनातून बऱ्या झालेल्या सुनेला सासऱ्याने दिले किडनीदान

औरंगाबाद - कुटुंबप्रमुख म्हणून खऱ्या अर्थाने लौकिकपात्र ठरत कोविड-१९ (Covid-19) मधून बऱ्या झालेल्या सुनेला सासऱ्याने किडनीदान (Kidney Donate) देऊन जीवनदान (Life Saving) दिले. विशेष म्हणजे दोघांचेही रक्तगट भिन्न होते. ‘एबी’ व ओ असे विसंगत मूत्रपिंड प्रत्यारोपणाची यशस्वी शस्त्रक्रिया औरंगाबादेतील मेडिकव्हर हॉस्पिटलमध्ये नुकतीच झाली, अशी माहिती हॉस्पिटलच्या केंद्रप्रमुख डॉ. नेहा जैन यांनी शनिवारी (ता. १२) दिली.

जालना जिल्ह्यातील २५ वर्षीय महिलेची किडनी सहा महिन्यांपूर्वी निकामी झाली. तिच्या शरीरातून मूत्र विसर्जन होत नसल्याने, सर्व शरीरावर सूज येणे आणि खोकला आल्यानंतर थुंकीतून रक्त येणे अशा समस्या उद्भवत होत्या. तिला ‘इंटेन्सिव्ह युनिट’मध्ये डायलिसीस उपचार करण्याची आवश्यकता होती. तिच्या या स्थितीमध्ये तिची किडनी प्रत्यारोपण शस्त्रक्रिया महत्त्वाची होती. परंतु किडनीदात्याच्या अनुपलब्धतेमुळे ही शस्त्रक्रिया स्थगित करण्यात आली. या कठीण परिस्थितीत महिलेच्या सासऱ्यांनी सुनेला किडनीदान करण्याचा धाडसी आणि कौतुकास्पद निर्णय घेतला. आव्हाने कमी नव्हती. त्यांचे रक्त गट (बी पॉझिटिव्ह) व रुग्णाचा रक्तगट (ओ पॉझिटिव्ह) असे भिन्न होते. कोणत्याही अन्य दात्याच्या अनुपस्थितीत, मेडिकव्हर हॉस्पिटलमध्ये तज्ज्ञांच्या टीमने ‘एबी’, ‘ओ’ विसंगत किडनी प्रत्यारोपण करण्याचा निर्णय डिसेंबर २०२१ ला घेतला.

डॉ. सचिन सोनी, डॉ. अभय महाजन, डॉ. अरुण चिंचोले, डॉ. सुनील पालवे, डॉ. राहुल रुईकर, डॉ. दिनेश लाहिरे, डॉ. सुनील मुर्के, आणि डॉ. अभिजित काबडे यांनी ही शस्त्रक्रिया केली. प्रत्यारोपण समन्वयक संदीप चव्हाण यांनी कायदेशीर औपचारिकता सुलभ केली.

कोविडचे आव्हान

शस्त्रक्रिया ठरली पण रुग्णाला कोविड संसर्ग झाला. त्यामुळे २ फेब्रुवारीला नेफ्रोलॉजिस्ट डॉ. सचिन सोनी यांनी शस्त्रक्रिया केली. सासरे व सून दोघांचेही किडनी कार्य सामान्य असून ते तंदुरुस्त आहेत. ‘एबी’, ‘ओ’ विसंगत किडनी प्रत्यारोपण हे मराठवाड्यातील पहिलीच शस्त्रक्रिया असून अवयवदानाची गरजही केंद्रप्रमुख डॉ. नेहा जैन यांनी व्यक्त केली.